O‘zbekiston Respublikasi Qishloq хo‘jаligi vаzirligi

Tadbir davomida O‘zbekiston va Slovakiya o‘rtasidagi iqtisodiy va investitsiyaviy hamkorlikni chuqurlashtirish masalalari muhokama qilindi. Ayniqsa, qishloq xo‘jaligi sohasida yirik qo‘shma loyihalarni amalga oshirish yuzasidan muhim kelishuvlarga erishildi. Jumladan, O‘zbekiston Respublikasi Qishloq xo‘jaligi vazirligi hamda Slovakiyaning “TASHSLAVTRADE” kompaniyasi o‘rtasida mamlakatimizda agrologistika markazlarini tashkil etish bo‘yicha memorandum imzolandi.

Mazkur kelishuv O‘zbekistonda qishloq xo‘jaligi mahsulotlarini saqlash va tashish uchun mo‘ljallangan zamonaviy omborlar infratuzilmasini kengaytirish va modernizatsiya qilishga qaratilgan. Tomonlar ilg‘or texnologiyalarni joriy etish, zamonaviy qishloq xo‘jaligi uskunalarini yetkazib berish, shuningdek, sifatli mahsulot eksportini yo‘lga qo‘yish orqali o‘zaro iqtisodiy manfaatlarni mustahkamlashga kelishib oldilar.

Memorandumga muvofiq, “TASHSLAVTRADE” kompaniyasi Toshkent viloyati yoki boshqa mos hududlarda ombor qurilishi bo‘yicha loyihalarni amalga oshirishga qiziqish bildirgan. Dastlabki investitsiya hajmi 5 million yevroga baholanmoqda. Kompaniya, shuningdek, Markaziy Osiyo mamlakatlaridan yuqori sifatli qishloq xo‘jaligi mahsulotlari va quritilgan mevalarni Yevropa bozorlariga eksport qilishda mintaqaviy ishlab chiqaruvchilar uchun ko‘prik vazifasini bajarishni rejalashtirmoqda.

O‘zbekiston tomoni esa loyihani davlat tomonidan qo‘llab-quvvatlash doirasida subsidiya va soliq imtiyozlari, yer ajratish, infratuzilmani rivojlantirish kabi mexanizmlarni taqdim etish majburiyatini oladi. Shuningdek, zamonaviy agrar tajriba almashinuvi, zarur ruxsatnomalarni olishda ko‘maklashish hamda tegishli davlat idoralari bilan hamkorlikni yo‘lga qo‘yish nazarda tutilgan.

Shu bilan birga, tomonlar qo‘shma Ishchi guruh tashkil etishga hamda boshqa manfaatdor investorlar va xalqaro tashkilotlarni ushbu loyihalarga jalb qilish imkoniyatlarini ko‘rib chiqishga kelishib oldilar.