BAAning “AFAQ” kompaniyasi bilan hamkorlik sari muhim qadam
2025-06-02 11:00:00 / Yangiliklar
Uchrashuv avvalida mehmonlar mamlakatimizda meva-sabzavotchilik sohasida yaratilgan imkoniyatlarni yuqori baholab, ayniqsa, tabiiy iqlim va unumdor yerlarda yetishtirilayotgan mahsulotlarning sifatiga alohida e’tibor qaratishdi. “AFAQ” vakillari O‘zbekiston bilan hamkorlik qilishdan manfaatdor ekanliklarini ifoda etdilar.
Muloqot chog‘ida vazirlik mutasaddilari O‘zbekistonning meva-sabzavot eksporti yo‘nalishidagi salohiyati, mavjud infratuzilma va logistik imkoniyatlar haqida batafsil ma’lumot taqdim etdilar. Shuningdek, eksport jarayonining har bir bosqichi, mahsulotlarni xalqaro talablarga muvofiq tayyorlash va yetkazib berish mexanizmlari muhokama qilindi.
Eng e’tiborlisi, uchrashuv davomida yaqin istiqbolda BAAga O‘zbekistondan ho‘l va quritilgan mevalar eksportini yo‘lga qo‘yish bo‘yicha aniq takliflar ilgari surildi. “AFAQ” kompaniyasi esa dastlabki bosqichda namuna sifatida "Made in Uzbekistan" brendi ostida ishlab chiqarilgan mahsulotlarni olib ketishga kelishib oldi. Bu esa kelajakdagi barqaror hamkorlik uchun mustahkam zamin bo‘lishi shubhasiz.
Uchrashuv yakunida ikki tomon o‘zaro manfaatli aloqalarni mustahkamlash, uzoq muddatli hamkorlik strategiyasini ishlab chiqish borasida aniq qadamlarni belgilab oldi.