Bekobod: ilmiy yondashuv asosida yangi navlar sinovi yoʻlga qoʻyiladi
2025-05-31 18:50:00 / Yangiliklar
O'rganish davomida vazir 25 gektar maydonda yetishtirilayotgan Ultra navli bug‘doyzor bilan tanishdi.
Dala holati, agrotexnik tadbirlar, o‘simliklarning rivojlanish darajasi va mavjud agroiqlim sharoitlari tahlil qilinib, bug‘doy navi uchun mazkur yerlarning mosligi qayd etildi.
Vazir o'z navbatida kelgusida boshqa navlarni ham tajriba tariqasida sinovdan o‘tkazish lozimligini ta’kidladi. Xususan, mahalliy agroiqlim va tuproq sharoitlariga mos Asr navining ekilishi maqsadga muvofiqligi qayd etildi.
Shuningdek, Toshkent viloyatining suv bilan ta’minlanish darajasi nisbatan og‘ir hududlardan biri ekani e’tiborga olinib, bu kabi maydonlarda demonstratsiyalashtirilgan tajriba hududlari tashkil etish, bu orqali har bir navning real sharoitdagi hosildorligi va bardoshlilik ko‘rsatkichlarini aniqlash muhimligi alohida ta’kidlandi.
Shu bilan birga, zamonaviy yondashuvlar asosida navlarni tanlash va agrotexnik tadbirlarni amalga oshirish bo‘yicha aniq topshiriqlar berildi.
Albatta, har bir qishloq xo‘jaligi mahsulotidan yuqori hosil olish — bu bugungi zamon agrar siyosatining ustuvor yo‘nalishi bo‘lib, u ilg‘or agrotexnik tadbirlar, innovatsion yondashuvlar va ilm-fan asosida shakllangan tizimli qarorlar bilan chambarchas bog‘liqdir.
Zero, aynan mana shunday zamonaviy va chuqur o‘ylangan yondashuvlargina yer resurslarining ichki salohiyatini to‘liq ishga solishga xizmat qiladi hamda har bir gektar maydondan mo‘l-ko‘l va barakali hosil olish imkoniyatini yuzaga keltiradi.