Hosildorlik poydevori – fermer fidoyiligi va ilm yutug‘ida
2025-05-31 13:45:00 / Yangiliklar
"Bek" fermer xo‘jaligi tasarrufidagi 24 gektarlik g‘alla maydonida "Obod" navli bug‘doy ekilgan. Bu nav bugungi kunda serhosil va istiqbolli navlardan biri sifatida e’tirof etilmoqda.
Hisob-kitoblarga ko‘ra, har bir gektarda 6 million dona ko‘chat parvarish qilinmoqda. Bunday intensiv yondashuv natijasida, fermer xo‘jaligi rahbari bu yil har gektardan 100 sentner hosil olishni mo‘ljallamoqda.
Bu – nafaqat yuqori ko‘rsatkich, balki yurtimiz g‘allachiligida yangi bosqichga o‘tishning yaqqol isboti. Vazir Ibrohim Abdurahmonov o‘rim-terim jarayonini tartibli, mehnatga ziyon yetkazmaydigan tarzda tashkil etish bo‘yicha o‘z tavsiyalarini berdi.
Xususan, hosilni nest-nobud qilmasdan yig‘ib olish, resurslarni tejash va har bir dona donning qadriga yetish bugungi kun talabiga aylangan.
Tashrif davomida "Obod" navining samaradorligi yuqori ekanligi ta’kidlandi. Ushbu navni boshqa hududlarda ham tajriba tariqasida ekish, shuningdek, serhosil navlarni ko‘paytirish orqali hosildorlikni bir necha baravar oshirish mumkinligi qayd etildi.