O‘zbekiston Respublikasi Qishloq хo‘jаligi vаzirligi

Shu ma’noda, So‘g‘d viloyatining Bobojon G‘ofurov tumanidagi “Bog‘i Milliy Vahdat”da barpo etilgan 70 gektarlik “Do‘stlik bog‘lari” qo‘shma ilmiy-amaliy tajriba almashinuvi maydoniga aylangan. Bu yerda tojikistonlik agrar mutaxassislar hamda O‘zbekiston qishloq xo‘jaligi ilmiy-tadqiqot institutlari olimlari birgalikda qator ekinlarni yetishtirib, zamonaviy agrotexnik uslublarni qo‘llash orqali tajriba almashishmoqda.

O‘zbekiston Respublikasi Qishloq xo‘jaligi vaziri Ibrohim Abdurahmonov boshchiligidagi delegatsiya ushbu bog‘ faoliyati bilan tanishish maqsadida tashrif buyurdi. Ular amalga oshirilayotgan keng ko‘lamli bog‘dorchilik ishlari, agrotexnik jarayonlar hamda ikki tomonlama hamkorlik asosida olib borilayotgan loyihalarni ko‘zdan kechirdi. Tashrif chog‘ida Ibrohim Abdurahmonovga Tojikiston Respublikasi Qishloq xo‘jaligi vaziri Qurbon Hakimzoda hamrohlik qildi.

E’tiborga molik jihati shundaki, “Bog‘i Milliy Vahdat” nafaqat agrar tajriba maydoni, balki ko‘p millatli xalqning birdamligini ifodalovchi ramziy maskan sifatida tashkil etilgan. Bu yerda viloyat, tuman va shaharlar miqyosida faoliyat yuritayotgan fermerlar uchun yer maydonlari ajratilgan bo‘lib, ular ilmiy yondashuv asosida seleksiya qilingan, iqlimga mos va serhosil ekinlarni yetishtirmoqda.

O‘zbekistonlik olim va mutaxassislarning ilmiy tajribalari ushbu bog‘da o‘z samaradorligini ko‘rsatmoqda. Jumladan, fermerlar uchun ajratilgan 9,5 gektar maydonda o'rikning “Flopriya” navi muvaffaqiyatli parvarish qilinmoqda. Shuningdek, bog‘da meva-sabzavot va poliz ekinlari yetishtirilmoqda. Uzumchilik yo‘nalishidagi ishlar ham jadal sur’atda davom etmoqda.

Rasmiy ma’lumotlarga ko‘ra, “Bog‘i Milliy Vahdat”ning umumiy maydoni 630 gektarni tashkil etadi. Shundan 501 gektar maydonda mevali bog‘lar barpo etilgan. Xususan, 353 gektar — o‘rik, 47 gektar — shaftoli, 37 gektar — olma, 31 gektar — bodom ekinlariga ajratilgan. Qolgan maydonlar esa boshqa turdagi qishloq xo‘jaligi ekinlari uchun mo‘ljallangan.

Eng muhimi, bu bog‘da yetishtirilayotgan turli navli o‘rik, olma va olxo‘ri mahsulotlari xorijiy bozorlar — jumladan Qirg‘iziston, Qozog‘iston va Rossiyaga eksport qilinadi. Bu esa mehnat qilayotgan fermerlar xo‘jaliklarining nafaqat ichki, balki xalqaro bozorda ham o‘z o‘rnini topayotganidan darak beradi.

Vazir Ibrohim Abdurahmonov amalga oshirilayotgan agrotexnik sa’y-harakatlardan mamnunligini bildirdi va bu kabi loyihalar ikki davlat o‘rtasidagi do‘stlik va hamjihatlik rishtalarini yanada mustahkamlashda muhim ahamiyat kasb etishini ta’kidladi. Shu bilan birga, u kelgusida ham mazkur hududda yangi va istiqbolli loyihalarni bosqichma-bosqich amalga oshirish yuzasidan bir qator takliflarni ilgari surdi.

Qayd etish lozim, mazkur tashrif va joriy etilayotgan loyihalarning mohiyati shundaki, ular faqat iqtisodiy emas, balki madaniy va ilmiy integratsiyani ham mustahkamlashda samarali omil bo‘lib xizmat qilmoqda. Shuni alohida ta’kidlash lozim, “Bog‘i Milliy Vahdat”ning yanada ko‘rkam tusga kirishi va rivojlanishda yurtimiz fermerlari va soha fidoyilarining ham o‘rni alohida ahamiyatga ega.