O‘zbekiston va Vengriya: qishloq xo‘jaligi sohasidagi hamkorlik istiqbollari kengaymoqda
2025-05-20 17:20:00 / Yangiliklar
Jumladan, Vengriyaning yetakchi investitsion tuzilmalaridan biri — 2015 yildan buyon turizm, qurilish, moliya, oziq-ovqat va agrar sektor kabi yo‘nalishlarda muvaffaqiyatli faoliyat yuritib kelayotgan “BDPST Group” kompaniyasi rahbariyati bilan samarali uchrashuv tashkil etildi.
Muzokaralar chog‘ida kartoshkani chuqur qayta ishlash, jumladan, chips va fri (qovurilgan kartoshka)ni sanoat usulida ishlab chiqarishga ixtisoslashgan zamonaviy korxonani O‘zbekistonda yo‘lga qo‘yish istiqbollari atroflicha muhokama qilindi.
E’tiborli jihati shundaki, “BDPST Group” ushbu istiqbolli loyiha doirasida tayyor ishlab chiqarish korxonasini sotib olish orqali tezkor hamda samarali investitsiyaviy modelni yo‘lga qo‘yishni rejalashtirmoqda. Ayni paytda mazkur tashabbusni amalga oshirish yuzasidan mahalliy hamkor kompaniyalar bilan muzokaralar faol olib borilmoqda.
Bundan tashqari, Vengriyada 10 yildan ortiq vaqt mobaynida premikslar, vitamin va fermentlar ishlab chiqarishda yetakchilik qilayotgan “Agrofeed” kompaniyasi bilan ham uchrashuv tashkil etildi. Tomonlar o‘rtasida mavjud salohiyat va bozor ehtiyojlari asosida O‘zbekistonda mahsulot ishlab chiqarishni yo‘lga qo‘yish masalalari muhokama qilindi.
Uchrashuv davomida kompaniya rahbariyati hozirda O‘zbekistonning barcha viloyatlarida ishonchli hamkorlarga ega ekanliklarini ta’kidladi. Shu bilan birga, hozirda Rossiya bozoridan olib kirilayotgan mahsulotlarga muqobil sifatida, respublikamiz hududida to‘liq siklli ishlab chiqarish liniyalarini tashkil etish borasida qiziqish bildirilgani alohida e’tirof etildi.
Kompaniyaning hozirgi faoliyati 350 million broyler tovuq, 7,2 million indyuk, 2,5 million naslchilik qushi, 2,5 million suv qushi va 120 ming bosh yirik shohli qoramol uchun yem qo‘shimchalari ishlab chiqarish bilan bog‘liq yirik hajmdagi ishlarga asoslanadi.
Mazkur muzokaralar O‘zbekiston qishloq xo‘jaligi sohasida innovatsion yondashuvlar, zamonaviy texnologiyalar va xalqaro investitsiyalarni jalb qilish yo‘lidagi navbatdagi muhim qadamlardan biri bo‘lib, mamlakatimizning oziq-ovqat xavfsizligini ta’minlash, eksport salohiyatini oshirish va yangi ish o‘rinlari yaratishdek strategik maqsadlariga xizmat qiladi.