O‘zbekiston Respublikasi Qishloq хo‘jаligi vаzirligi

Unda vazir o‘rinbosarlari, markaziy apparat xodimlari, viloyat va tuman qishloq xo‘jaligi boshqarmalari rahbarlari ishtirok etdi.

Yig‘ilish avvalida paxtachilik masalalari muhokama qilindi. Dala ishlarida agrotexnologik talablarga qat’iy rioya qilish bugungi kunning dolzarb vazifasi ekani yana bir bor ta’kidlandi. Ayniqsa, kultivatorlarni to‘liq safarbar etish va ishga tayyor holga keltirishda sustkashlikka yo‘l qo‘yilmasligi qat’iy ogohlantirildi. Bu boradagi nazorat mas’ul shaxslarga aniq topshiriq sifatida yuklatildi.

“Shinjon” agrotexnologiyasining to‘liq joriy etilmagani sababli yuzaga kelayotgan muammolar ham tilga olindi. Vazir bu muammolarni kechiktirmasdan, tezkorlik bilan bartaraf etish zarurligini qayd etdi. Mineral o‘g‘itlar bilan ta’minlash hamda zararkunandalarga qarshi kurash tadbirlarini ham ortga surmasdan amalga oshirish lozimligi ta’kidlandi.

Yig‘ilishning navbatdagi muhim mavzusi — kartoshkachilik bo‘ldi. Takroriy ekin sifatida kartoshkani keng maydonlarga ekish nafaqat sohaning, balki mamlakat oziq-ovqat xavfsizligining ajralmas qismi ekani alohida qayd etildi.

Shuningdek, g‘alla o‘rimi mavsumiga puxta tayyorgarlik ko‘rish, don qabul qilish maskanlarining imkoniyatlarini to‘liq tahlil qilish va ishlarni ikki smenada tashkil etish zarurligi belgilandi. Har bir smenada ikki nafar tarozibon va ikki nafar nazoratchi faoliyat yuritishi kerakligi ko‘rsatib o‘tildi.

Jarayonlarni zamonaviy boshqarish — davr talabi. Don tashuvchi avtotransport vositalarining davlat raqamlari asosida ro‘yxatga olinishi, ularning harakati onlayn kameralar orqali kuzatilishi, tarozi ko‘rsatkichlari real vaqt rejimida raqamli platformalarda aks ettirilishi va “Agroplatforma” tizimi bilan integratsiyalashuvi — bularning barchasi mavsumga qadar amalga oshirilishi lozim bo‘lgan vazifalar sifatida belgilandi.

Shuningdek, don qabul qilish punktlari xodimlarini o‘qitish, ularga amaliy ko‘nikmalarni yetkazish, bu borada “ishchi guruh”lar tuzib, joylarda tushuntirish ishlarini tashkil etish vazifasi ham kun tartibidan o‘rin oldi.

Yig‘ilish davomida muhokama etilgan har bir masala ortida mehnat, adolat va ochiqlik tamoyillari mujassam. Har bir topshiriq — kechiktirib bo‘lmaydigan dolzarb vazifadir. Yig‘ilishning asosiy maqsadi — sohada olib borilayotgan islohotlar sur’atini oshirish, tizim samaradorligini ta’minlash va eng muhimi, xalqimiz dasturxonining to‘kin bo‘lishiga xizmat qilishdir.