O‘zbekiston Respublikasi Qishloq хo‘jаligi vаzirligi

Yig‘ilish avvalida Vengriya bilan amalga oshirilayotgan agrar loyihalarning joriy holati va istiqboldagi rejalar muhokama qilindi. Vengriya bugungi kunda aqlli qishloq xo‘jaligi, qayta ishlash texnologiyalari hamda zamonaviy boshqaruv tizimlari bo‘yicha Yevropaning ilg‘or tajribasiga ega mamlakat sifatida e’tirof etiladi. Shu bois bu mamlakat bilan o‘rnatilgan hamkorlik O‘zbekiston agrar tarmog‘ining rivojlanishiga xizmat qilmoqda.

Yig‘ilishda talabalar almashinuvi, baliqchilik va chorvachilikni rivojlantirish, chorva mollari uchun ozuqa yetishtirish hamda meva-sabzavotlarni chuqur qayta ishlash kabi yo‘nalishlardagi loyihalar tahlil qilindi.

Vaziro‘z navbatida, oziq-ovqat xavfsizligini ta’minlash borasida kechiktirib bo‘lmaydigan chora-tadbirlarni aniq va keskin ifoda etdi. Jumladan, go‘sht va sut mahsulotlari ishlab chiqarish hajmini oshirish, ayniqsa, kartoshkachilikni rivojlantirish masalalariga alohida e’tibor qaratdi. Har bir topshiriq aniq natijalarga yo‘naltirilgan bo‘lib, soha vakillariga tegishli ko‘rsatmalar berildi.

Shuningdek, yig‘ilishda Yevropa va MDH davlatlari bilan hamkorlik aloqalarining joriy holati ham ko‘rib chiqildi. O‘zaro manfaatli loyihalarni amalga oshirish, mavjud resurslardan to‘liq foydalanish hamda qo‘shni davlatlar bilan yangi hamkorlik yo‘nalishlarini belgilash zarurligi ta’kidlandi. Xususan, oziq-ovqat xavfsizligi, naslchilik va ozuqabop ekinlar yetishtirish kabi strategik yo‘nalishlarda yangi tashabbuslar ishlab chiqilishi lozimligi qayd etildi.

Zamonaviy qishloq xo‘jaligi bugun nafaqat dalada, balki muzokaralar, kelishuvlar, ilm-fan va texnologiyalar asosida shakllanmoqda. Oziq-ovqat xavfsizligi esa bugungi kunda har bir davlat siyosatining ustuvor yo‘nalishiga aylangan. Yig‘ilishda ko‘rib chiqilgan har bir masala ertangi kun taomini, milliy xavfsizlikni va xalq salomatligini ta’minlash yo‘lidagi muhim qadamdir.