Bilim, tajriba, amaliyot: Surxondaryoda yangi tomorqachilik maktabi tashkil etildi
2025-05-14 10:40:00 / Yangiliklar
Mazkur maydonda viloyat iqlimiga mos keladigan mevali daraxtlardan tortib, 14 turdagi qishloq xo‘jaligi mahsulotlari tajriba tariqasida, konturlarga ajratilgan holda yetishtirilmoqda. Bu yerda qulupnay, poliz ekinlari va hattoki rayhon ham tomchilatib sug‘orish tizimi orqali oziqlantirilmoqda.
Tadbirkor, fermer Mo‘min Umarov tashabbusi bilan tashkil etilgan mazkur tajriba ekin maydonida zamonaviy usullar asosida olma, shaftoli, gilos va iqlim sharoitiga tez moslashadigan zaytun navlari parvarish qilinmoqda.
Shuningdek, bu yerda fermer tomonidan tuman yoshlari, fermer va dehqonlar uchun ekinlarni to‘g‘ri yetishtirishdan tortib, ularni eksportga yo‘naltirishgacha bo‘lgan barcha jarayonlarni o‘zida aks ettiruvchi konseptual bilimlarga asoslangan tomorqachilik maktabi hаm tashkil etilgan.
Maktabda ekin turlarini tanlash, ularni yetishtirishda tatbiq etiladigan agrotexnologiyalar, sug‘orish va oziqlantirishga doir nazariy va amaliy tajribalar o‘rgatiladi. Vazir ushbu yondashuvlar bilan tanishar ekan, bunday o‘qitish tizimini Agroxizmatlar ko’rsatish markazi (AKIS) bilan hamkorlikda tashkil etish yuzasidan o‘z takliflarini bildirdi.
Vazir, shuningdek, Toshkent davlat agrar universiteti olimlari tomonidan shakllantirilgan o‘qitish mexanizmlarini mazkur maktabda joriy etish, bunda tajribali mutaxassislar ishtirokini ta’minlagan holda bilim, tajriba va amaliyot uyg‘unligi asosida ishni tashkil etish yuzasidan tegishli ko‘rsatmalar berdi.
Aytish mumkinki, mana shunday uchlik — ya’ni bilim, tajriba va amaliyot mexanizmi to‘g‘ri joriy etilsa, haqiqiy tomorqachilik maktabi yaratiladi va bunday yondashuv asosida mahalliy aholi vakillari, tuman hamda unga yondosh hududlardagi ko‘plab fermer va dehqonlar yetarli bilim va ko‘nikmalarga ega bo‘ladilar.
Qayd etish lozim, fermerga qarashli issiqxona hududida ham erta pishadigan mahsulotlarni yetishtirish keng yo‘lga qo‘yilgan. Bu yerda ayni kunlarda qovundan tortib, 8 turdagi qishloq xo‘jaligi mahsulotlari zamonaviy standartlar asosida parvarish qilinmoqda. Tatbiq etilayotgan yondashuvlar esa tizimli yo‘lga qo‘yilgan.
Vazir o‘z navbatida, mahsulotlar sonini oshirish, tashkil etilgan maktabni yanada rivojlantirish, qamrovini kengaytirish, joriy etilayotgan yangicha usullarni boshqa hududlarda ham tajriba tariqasida sinovdan o‘tkazishga doir ko‘rsatmalar berdi ва barcha sa’y-harakatlardan mamnun ekanligini alohida ta’kidladi.