O‘zgarishlar nuqtasida yangilikdan qo‘rqmaslik – ertangi taraqqiyot garovi
2025-05-13 10:05:00 / Yangiliklar
Tashrifning birinchi manzili Termiz tumanidagi "Jayxun Klaster" MCHJ ga qarashli "Yangiariq" paxta qabul qilish maskani bo‘ldi.
Vazir Ibrohim Abdurahmonov, Vazirlar Mahkamasi huzuridagi Agroinspeksiya rahbari Abror Vahobov hamda Ichki ishlar vaziri o‘rinbosari Saidkarim Nishonboyevlar bilan birga, g‘alla mavsumiga tayyorgarlik ko‘rish uchun barcha texnikalar va resurslarning tayyorligini ko‘zdan kechirdi.
Bugungi kunda viloyatda 288 ta kombayn va 1400 dan ortiq qishloq xo‘jaligi texnikalari mavjud bo‘lib, g‘alla qabul qilish maskanlari esa 20 tani tashkil etadi.
Tashrif davomida Surxondaryo viloyatidagi g‘alla qabul qilish maskanlarida ishlarning tashkil etilishiga alohida e’tibor qaratildi. Soha rivojlanishida yuqori samaradorlikni ta’minlash va g‘alla qabul qilish jarayonlarini tizimli boshqarish, ayniqsa, Surxondaryo viloyatida muhim ahamiyatga ega.
Ma’lumki, bu hududda g‘alla erta pishadi, shuning uchun aynan Surxondaryodagi ishlarni to‘g‘ri tashkil etish va samarali boshqarish nafaqat viloyat, balki boshqa hududlar uchun ham namuna bo‘lishi mumkin.
Shu bilan birga, g‘alla qabul qilish jarayonlarini raqamlashtirishga katta e’tibor qaratilmoqda. G‘allani terishdan tortib, uning qabul qilinishigacha bo‘lgan barcha jarayonlar raqamli platformalar orqali amalga oshiriladi.
Agroplatforma orqali fermerlar, ishlab chiqaruvchilar va qishloq xo‘jaligi mutaxassislari barcha zarur ma’lumotlarni onlayn ravishda kuzatib borish imkoniga ega bo‘lishadi. Agroplatforma, o‘zining zamonaviy texnologiyalari bilan, hosilni monitoring qilish, tahlil qilish va boshqarish jarayonlarini yanada samarali va tezkor amalga oshirish imkonini yaratadi.
Bu, o‘z navbatida, hosilning aniq raqamlar asosida monitoring qilish, tahlil qilish va boshqarish imkoniyatlarini yaratadi. Raqamlashtirish jarayoni sohada shaffoflikni ta’minlaydi, samaradorlikni oshiradi va barcha jarayonlarni tezkor va aniq amalga oshirishga yordam beradi.
Ayni jarayonda, vazir boshchiligidagi ishchi guruhning Surxondaryoga tashrifi bejiz emas. Bu tashrif nafaqat g‘alla qabul qilish maskanlaridagi ishlar bilan tanishish, balki yangi texnologiyalarni joriy etish, ishlab chiqarish jarayonlarini takomillashtirish va bu tajribani boshqa hududlarga yoyish maqsadida keng qamrovli reja asosida amalga oshirilayotgani bilan ahamiyatli.
Zero, Surxondaryo viloyatidagi innovatsion yondashuv va tajriba butun mamlakat bo‘ylab qishloq xo‘jaligi sohasini yangi bosqichga olib chiqishga, samarali boshqaruvni ta’minlashga va qishloq xo‘jaligida global darajadagi muvaffaqiyatlarga erishish yo‘lida muhim qadamlar tashlashga xizmat qiladi.