O‘zbekiston Respublikasi Qishloq хo‘jаligi vаzirligi

Mazkur tashrif nafaqat ilmiy-amaliy faoliyatning muhim bosqichi, balki xalqimizning boy tarixiy-ma’naviy merosini chuqur anglash, uni keng targ‘ib etish hamda yosh avlod qalbida vatanparvarlik tuyg‘ularini shakllantirish yo‘lidagi ezgu intilishlarning yorqin ifodasidir.

Kunning birinchi yarmida Qarshi tumanida joylashgan Janubiy dehqonchilik ilmiy-tadqiqot instituti tajriba maydonida Respublika miqyosidagi o‘quv-amaliy seminar bo‘lib o‘tdi. Unda qishloq xo‘jaligi sohasida ilm-fan yutuqlarini amaliyotga joriy etish, zamonaviy innovatsion texnologiyalarni keng qo‘llashning dolzarb jihatlari muhokama qilindi. Seminar doirasida mutaxassislar o‘z tajribalari bilan o‘rtoqlashib, sohadagi dolzarb masalalar yuzasidan fikr almashishdi.

Kunning ikkinchi yarmida esa Shahrisabz shahriga safar uyushtirilib, ziyorat turizmiga oid manzillar ko‘zdan kechirildi. Xususan, ishchi guruh a’zolari Oq Saroy — Amir Temur hayoti va faoliyati bilan bevosita bog‘liq bo‘lgan, o‘zbek me’morchiligining betakror durdonasiga aylangan muqaddas maskanni ziyorat qilishdi. Ushbu majmua — tariximizning porloq sahifalari mujassam bo‘lgan, milliy g‘urur va oriyatimiz ramzidir.

Shuningdek, Ko‘ksaroy va Dovrug‘ tilovat majmualariga ham tashrif buyurildi. Bu qadamjolar nafaqat tarixiy ahamiyatga ega, balki xalqimizning ma’naviy dunyoqarashini ifoda etuvchi muqaddas maskanlardir. Ziyoratlar davomida ishtirokchilar tarixiy obidalar bilan yaqindan tanishish, ularning zamirida mujassam qadriyat va saboqlarni chuqur his etish imkoniga ega bo‘lishdi.

Bugungi kunda ichki turizmni rivojlantirish masalasi davlat siyosatining ustuvor yo‘nalishlaridan biriga aylangan. Prezidentimiz Shavkat Mirziyoyev ta'kidlaganidek:

“Agar har bir yurtdoshimiz yurtimizdagi tarixiy obidalar, ziyoratgohlar va tabiiy go‘zalliklarni chuqur anglab, ularni ziyorat qilsa, bu nafaqat turizmning rivojlanishiga, balki yosh avlodni vatanparvarlik ruhida tarbiyalashga xizmat qiladi.”

Haqiqatan ham, mamlakatimiz bo‘ylab tashkil etilayotgan sayohatlar, tarixiy joylarga uyushtirilayotgan tashriflar ayni shu g‘oya hayotga tatbiq etilayotganining yaqqol dalilidir. Qashqadaryodagi mazkur tashrif ham ana shunday ruhiy-ma’naviy jihatdan boy voqelik bo‘lib, ishtirokchilarga ilm-fan, tarix va ma’naviyat uyg‘unligini chin dildan his etish imkonini berdi.

Shubhasiz, bunday tashabbuslar yurtimizda yoshlarda faxr va g‘urur tuyg‘ularini mustahkamlash, milliy o‘zlikni anglashga xizmat qiluvchi muhim qadamlardan biridir.