O‘zbekiston Respublikasi Qishloq хo‘jаligi vаzirligi

Ana shunday ulug‘ ayyom arafasida, O‘zbekiston Respublikasi Qishloq xo‘jaligi vazirligi jamoasi yurtimizdagi muhim ma’naviy maskanlardan biri – O‘zbekiston Respublikasi Qurolli Kuchlari Davlat muzeyiga tashrif buyurdi. Bu tashrif – tarixni anglash, xotirani ardoqlash va avlodlar davomiyligini chuqur his etish yo‘lida yana bir ahamiyatli qadamlardan biri bo‘ldi.

Muzey zallarida jamoa vakillari Ikkinchi jahon urushi va Mustaqillik yillarida Vatan tinchligi, hududiy daxlsizligi yo‘lida mardlarcha kurashgan yurtdoshlarimizning bebaho jasoratiga guvoh bo‘ldilar. Har bir ekspozitsiya, har bir tarixiy hujjat, har bir eksponat – bu xalqimizning mardlik ruhi, sabr-toqat va fidoyilik darsidir. Ayniqsa, urush maydonlarida jon bergan yurtdoshlarimiz xotirasiga bag‘ishlangan sahnalar barchaning ko‘ziga yosh olib, yuragida chuqur o‘y va faxr uyg‘otdi.

Tashrif davomida vazirlik vakillari yurt himoyachilarining hayoti, harbiy xizmatdagi sadoqat, milliy g‘urur va o‘zlikni anglashdek yuksak qadriyatlar haqida chuqur tafakkurga cho‘mishdi. Bu safar ularning qalbida vatanga muhabbat, ajdodlarga hurmat va yosh avlodni ona yurtga sadoqat ruhida tarbiyalashdek muqaddas burchni yanada teranroq anglashga sabab bo‘ldi.

Shu o‘rinda ta’kidlash lozimki, Qishloq xo‘jaligi vazirligi jamoasining bunday tashabbusi yoshlar, ayniqsa, yangi avlod xodimlari uchun ma’naviy-axloqiy tarbiyaning o‘ziga xos maktabi bo‘lib xizmat qilmoqda.

Zero, ajdodlar xotirasini ardoqlash – bu bugunni qadrlash va ertangi kun uchun mas’uliyat bilan yashashdir.