ASK Facility – ilmiy asos, strategik yondashuv, samarali natijalar
2025-05-07 15:45:00 / Yangiliklar
Mazkur tadbirda Qishloq xo‘jaligi vaziri o‘rinbosari Alisher Shukurov, Yevropa Ittifoqi delegatsiyasi vakillari, Qishloq xo‘jaligi sohasida strategik rivojlanish va tadqiqotlar xalqaro markazi (ISCAD) hamda vazirlik tizimidagi tashkilotlar rahbarlari ishtirok etdi.
Yig‘ilishda 2021-yildan buyon muvaffaqiyatli faoliyat yuritayotgan ASK Facility dasturining muhim yutuqlari, texnik va metodologik yondashuvlar orqali erishilgan natijalar atroflicha muhokama qilindi. Jumladan, so‘nggi yillarda O‘zbekiston qishloq xo‘jaligida amalga oshirilayotgan islohotlarning barqarorligiga loyiha tomonidan ko‘rsatilayotgan ko‘makning ahamiyati alohida ta’kidlandi.
Tadbir davomida 2024-yil boshidan buyon erishilgan asosiy natijalar, duch kelingan muammolar va ularni bartaraf etish bo‘yicha amalga oshirilgan choralar yuzasidan batafsil hisobotlar taqdim etildi. Loyiha boshqaruvi qo‘mitasi tomonidan kelgusi bosqichda amalga oshiriladigan ustuvor yo‘nalishlar belgilanib olindi.
Yig‘ilish yakunida ishtirokchilar o‘zaro hamkorlik aloqalarini yanada mustahkamlashga kelishib oldi. Bu esa, nafaqat qishloq xo‘jaligi strategiyasining izchil amalga oshirilishiga, balki butun agrar tizimda ilm-fan asosidagi barqaror va samarali boshqaruv tamoyillarini keng joriy etishga xizmat qilishi kutilmoqda.