O‘zbekiston Respublikasi Qishloq хo‘jаligi vаzirligi

Dastavval, mazkur markaz binosining kapital ta’mirlanish jarayoni, markaz atrofida barpo etilgan ko‘rgazmali maydonlar va zamonaviy texnologiyalar asosida yetishtirilayotgan ekinlar holati o‘rganildi.

Bugungi kunda markaz binosini to‘liq qayta ta’mirlash, zamonaviy agrotexnologiyalarni qo‘llash imkonini beruvchi ilmiy-amaliy maydonlarni yaratish bo‘yicha ish qizg‘in kechmoqda.

Ayni paytda, markaz atrofida tashkil etilgan ko‘rgazmali maydonlarda bug‘doy, arpa, sabzavot ekinlari hamda yuqori hosildor mevali daraxt ko‘chatlari parvarish qilinmoqda. Ayniqsa, bu yerda o‘stirilayotgan makkajo‘xori, soya, dukkakli ekinlar va ularning istiqbolli gibrid navlari alohida e’tiborga loyiq.

Tashrif davomida 26 gektar maydonda Xitoyning Shinjon tajribasi asosida yetishtirilayotgan xorijiy g‘o‘za navlari, shuningdek, mahalliy intensiv agrotexnologiyaga asoslangan g‘o‘za namunalarining holati ham ko‘zdan kechirildi. Mazkur navlar sho‘rlanishga, harorat o‘zgarishlariga va boshqa agrobiotik stresslarga chidamliligi bo‘yicha sinovdan o‘tkazilmoqda.

Shuningdek, bu yerda xorijiy g‘o‘za navlarini turli tashqi ta’sirlardan himoya qilish uchun mo‘ljallangan xo‘rak maydonlari ham sifat darajasida tashkil etilgan. Ahamiyatlisi, tomchilatib sug‘orish texnologiyasi to‘liq joriy etilgan. Tabiiyki, bunday yondashuv suvdan unumli foydalanish, ekin hosildorligini oshirishda muhim ahamiyat kasb etadi.

Rasmiylarning ma’lum qilishicha, Qishloq xo‘jaligi vazirligining modernizatsiya dasturi doirasida markazda hozirgi kunda 5 ta zamonaviy maxsus laboratoriya tashkil qilinmoqda. Ta’mirlash ishlari nihoyasiga yetganidan so‘ng, laboratoriyalar to‘liq zaruriy asbob-uskunalar, zamonaviy texnologiyalar bilan ta’minlanadi.

Vazir ushbu hududda amalga oshirilayotgan barcha amaliyotlarni yuqori baholab, tajriba va amaliyot uyg‘unligida shakllanayotgan bu kabi agroinnovatsion yondashuv kelgusida o‘z natijasini berishiga ishonch bildirdi. Shu bilan birga, mas’ullarga ish jarayonlarini sifatli va tizimli tashkil etishga doir tegishli topshiriqlar berdi.