Toshkentda sanoat va hamkorlik bayrami: “INNOPROM. Markaziy Osiyo – 2025” o‘z ishini boshladi
2025-04-28 21:40:00 / Yangiliklar
Mazkur nufuzli tadbirda dunyoning 37 davlatidan 10 mingdan ortiq delegat ishtirok etmoqda. 18 ming kvadrat metrdan ziyod maydonni egallagan ko‘rgazmada 400 dan ortiq kompaniya vakillari o‘z innovatsion ishlanmalari va ilg‘or texnologiyalarini taqdim etmoqda.
Ko‘rgazmaning asosiy maqsadi – sanoat hamkorligini mustahkamlash, iqtisodiy sheriklikni kengaytirish va o‘zaro manfaatli loyihalarni amalga oshirishdir. Shuningdek, mintaqalar va davlatlar o‘rtasida to‘g‘ridan-to‘g‘ri muloqotni rivojlantirish, umumiy manfaatlar nuqtalarini aniqlash kabi masalalar ham kun tartibida turibdi.
Ushbu ko‘rgazma doirasida Rossiya, Xitoy, Hindiston kabi davlatlar o‘z innovatsion mahsulotlarini namoyish qilmoqda.
Albatta, O‘zbekiston ham xalqaro sanoat maydonida munosib ishtirok etmoqda. Ko‘rgazma zallarida O‘zbekiston Qishloq xo‘jaligi vazirligining stendi alohida e’tiborni tortmoqda. Bu yerda tashrif buyuruvchilar mamlakatimiz agrar sohasida so‘nggi yillarda amalga oshirilgan islohotlar, qishloq xo‘jaligi mahsulotlarini yetishtirish va qayta ishlashdagi mavjud imkoniyatlar haqida batafsil ma’lumot olishmoqda.
Tadbir doirasida nafaqat mahsulotlar namoyishi, balki yuzlab biznes-forumlar, B2B uchrashuvlar va seminarlar ham tashkil etilmoqda. Prezident Shavkat Mirziyoyevning ko‘rgazmaga tashrifi va forumlardagi faol ishtiroki ushbu sanoat festivaliga yanada yuqori siyosiy va iqtisodiy ahamiyat bag‘ishlamoqda.