Xalqaro standartlar sari: O‘zbekiston qishloq xo‘jaligi yangi bosqichda
2025-04-28 17:15:00 / Yangiliklar
O‘zbekiston ham bu jarayondan chetda qolmayapti. Aksincha, faol va qat’iyatli qadamlar tashlamoqda. Xususan, 2024-yil iyun oyida Prezidentimiz Shavkat Mirziyoyevning Turkiya Respublikasiga rasmiy tashrifi chog‘ida ikki tomonlama savdo-iqtisodiy hamkorlikni yanada mustahkamlash borasida tarixiy ahamiyatga molik kelishuvlarga erishildi. Aynan shu uchrashuvlar doirasida qishloq xo‘jaligi sohasida ham xalqaro tajriba va standartlarni joriy etish bo‘yicha O‘zbekiston Respublikasi Qishloq xo‘jaligi vazirligi va Turkiyaning nufuzli “Eco Inspect” kompaniyasi bilan birgalikda mamlakatimizda “Organic” va “GlobalGAP” standartlari talablarini joriy etish hamda mutaxassislar tayyorlash bo‘yicha yangi markaz tashkil etish bo‘yicha kelishuvga erishildi.
Tez orada nafaqat O‘zbekistonda, balki Markaziy Osiyoda yagona bo‘lgan “ACS BIO CERTIFICATION MMC” xalqaro sertifikatlash markazi tashkil qilindi va Samarqand Agroinnovatsiyalar va tadqiqotlar institutida maxsus o‘quv kurslari faoliyat boshladi.
Bu kurslar nafaqat bilim va ko‘nikmalar berish, balki milliy amaliyot va xalqaro tajribani uyg‘unlashtirishning yorqin namunasi bo‘lib xizmat qilmoqda. Turkiyalik tajribali mutaxassislar Mustafa Chetinkaya va Kamil Qoratosh rahbarligida o‘tkazilgan seminar-treninglar “GlobalGAP” va “Organic” sertifikatlash talablari, dala sharoitlarida sinov va a’zolik mezonlari kabi muhim mavzularni o‘z ichiga oldi.
Bugun bu kurslar orqali xalqaro miqyosda tan olingan bilim va tajribaga ega yangi avlod mutaxassislari yetishib chiqmoqda. Ular imtihonlarni muvaffaqiyatli topshirib, guvohnomalarga ega bo‘ladilar va endilikda yurtimiz mahsulotlarini jahon bozoriga sifatli va raqobatbardosh tarzda olib chiqishda muhim rol o‘ynashadi. Har bir sertifikat — bu nafaqat hujjat, balki sifat, ishonch va imkoniyat timsolidir.
Aslida, xalqaro standartlarni joriy etish oddiy qog‘ozbozlik emas. Bu mahsulot sifatini oshirish, iste’molchi ishonchini qozonish va milliy iqtisodiyot poydevorini mustahkamlash yo‘lidagi fidokorona mehnatdir. Har bir sertifikat O‘zbekiston mahsulotlari uchun ochilgan yangi bozor, xalqaro miqyosda tan olingan ishonch ramzidir.
Shu bois, xalqaro standartlarga asoslangan taraqqiyot sari qo‘yilgan har bir qadam — kelajagimiz uchun eng qimmatli sarmoyadir. O‘zbekiston bugun nafaqat o‘zining agrar salohiyatini dunyoga namoyon etmoqda, balki xalqaro maydonda ishonchli hamkor sifatida o‘z o‘rnini mustahkamlab bormoqda.