O‘zbekiston Respublikasi Qishloq хo‘jаligi vаzirligi

Yig‘ilishda issiqxona xo‘jaliklarining bugungi holati, erishilayotgan yutuqlar, yo‘l qo‘yilayotgan kamchiliklar va o‘z yechimini kutayotgan dolzarb masalalar muhokama qilindi.

Vazir Ibrohim Abdurahmonov sohada amalga oshirilayotgan ishlar haqida so‘z yuritar ekan, jahon miqyosidagi geosiyosiy vaziyat sharoitida oziq-ovqat xavfsizligini ta’minlash, ichki bozorda ayrim qishloq xo‘jaligi mahsulotlarining uzluksiz yetkazib berilishini ta’minlash hamda aholining ehtiyojidan kelib chiqib, mahsulotlarni maqbul narxlarda yetkazib berish zarurligini ta’kidladi.

Shuningdek, issiqxonalarda yetishtirilayotgan mahsulotlarni ichki va tashqi bozorlardagi ehtiyojdan kelib chiqqan holda diversifikatsiya qilish, poliz ekinlarini ham issiqxonalarda yetishtirishni yo‘lga qo‘yish zarurligi ta’kidlandi. Jumladan, dong‘i yetti iqlimga mashhur qovunlarni issiqxonada yetishtirib, eksportga yo‘naltirish, buning uchun esa issiqxona sharoitiga mos qovun navlarini tanlab olish hamda bu borada Koreya tajribasini o‘rganish zarurligi qayd etildi. Shu maqsadda issiqxona xo‘jaligi bilan shug‘ullanuvchi tadbirkorlar orasidan dastlabki ishchi guruhni shakllantirish bo‘yicha mas’ullarga topshiriqlar berildi.

Yig‘ilish davomida issiqxona xo‘jaliklarida hosildorlikni oshirish, eksport salohiyatini kengaytirish, ichki bozorda mahsulot yetkazib berilishini uzluksiz ta’minlash bo‘yicha aniq vazifalar belgilab olindi. Tadbir ishtirokchilari hududlardagi mavjud muammolar, xususan, energiya ta’minoti, suv resurslaridan foydalanish, mahsulotlarni sertifikatlash va logistika masalalari yuzasidan o‘z fikrlarini bildirishdi. Ko‘tarilgan masalalarni qisqa fursatlarda hal etish bo‘yicha mutasaddilarga zarur topshiriqlar berildi.