Sirdaryo: paxta yetishtirish bo‘yicha amaliy seminar
2025-04-26 16:25:00 / Yangiliklar
Seminarlarda 2025-yil hosili uchun paxta yetishtirishda an’anaviy va intensiv (Shinjon modeli) agrotexnologiyalari asosida qo‘llanilayotgan ilg‘or tajribalar muhokama qilindi. Tadbir ishtirokchilari – vazirlik mutaxassislari, soha olimlari, tashkilot rahbarlari va fermerlar paxta navlarini o‘z vaqtida parvarishlash, sug‘orish, oziqlantirish, tuproqqa ishlov berish hamda o‘sishni boshqarish bo‘yicha ilmiy asoslangan uslublarni amaliy misollar orqali ko‘rib chiqdilar.
Mazkur seminarlar orqali dalalarda kechiktirib bo‘lmaydigan agrotexnik tadbirlarni sifatli va o‘z vaqtida bajarish bo‘yicha zaruriy tavsiyalar berildi. Tadbir yakunida fermerlar o‘zlarini qiziqtirgan savollarga javob oldi hamda zamonaviy yondashuvlar yuzasidan tajriba almashildi.
Qayd etish joizki, bunday amaliy uchrashuvlar mamlakat bo‘ylab bosqichma-bosqich o‘tkazilib, joylardagi agrar bilim va ko‘nikmalarni yanada kuchaytirishga xizmat qilmoqda.