Sardobada paxta yetishtirish bo‘yicha amaliy seminar-trening o'tkazildi
2025-04-26 12:30:00 / Yangiliklar
Sirdaryo viloyati Sardoba tumanida Qishloq xo‘jaligi vazirligi tomonidan belgilangan grafik asosida 2025-yil hosiliga tayyorgarlik doirasida paxta yetishtirishning zamonaviy usullariga bag‘ishlangan amaliy seminar-treninglar bo‘lib o‘tdi. Tadbirda vazirlik mutaxassislari, soha olimlari, tashkilot rahbarlari hamda mahalliy fermerlar ishtirok etdi.
Seminar davomida an’anaviy va intensiv (Shinjon modeli) agrotexnologiyasi asosida parvarishlanayotgan paxta navlarini samarali yetishtirishga doir masalalar muhokama qilindi. Jumladan, urug‘lik maydonlarida kechiktirib bo‘lmaydigan agrotexnik tadbirlarni – o‘sishni boshqarish, sug‘orish, tuproqqa ishlov berish hamda o‘g‘itlash ishlarini o‘z vaqtida va sifatli bajarish bo‘yicha ilmiy tavsiyalar taqdim etildi.
Tadbir yakunida ishtirokchilar o‘zaro tajriba almashib, amaliy ko‘nikmalarni boyitishga muvaffaq bo‘lishdi. Ma’lumot uchun, bunday seminarlar respublika bo‘ylab belgilangan grafik asosida bosqichma-bosqich o‘tkazildi va bu jarayon davom etmoqda.