O‘zbekiston Respublikasi Qishloq хo‘jаligi vаzirligi

Mas’ullarning ta’kidlashicha, ushbu maydonning 4 gektariga tarvuz, 5 gektariga pomidor ekilgan bo‘lib, qolgan qismiga qovun va lavlagi navlarini ekish ishlari boshlangan. Eng e’tiborga molik jihati — barcha ekinlar plyonka ostiga olingan bo‘lib, bu usul agrotexnik jihatdan zamonaviy va samarali hisoblanadi.

Shuningdek, sug‘orish tizimida suv sarfini kamaytirish, namlikni me’yorida taqsimlash hamda oziqlantirishni osonlashtirish maqsadida tomchilatib sug‘orish texnologiyasi joriy etilgan. Bu esa xarajatlarni sezilarli darajada kamaytirib, hosil sifatini oshirishga xizmat qilmoqda.

Qayd etish joizki, dala ishlarida ilmiy asosga tayanilgan agrotexnik yondashuvlar samaradorlikni ta’minlaydi. Xususan, poliz ekinlarini plyonka ostida yetishtirish ochiq usulga nisbatan ko‘proq hosil olish, hosil hajmini oshirish va mevalarning sifatini yaxshilashga yordam beradi.

Mutasaddilar bergan ma’lumotlarga ko‘ra, ushbu usulda kutilayotgan hosildorlik gektariga 80-100 tonnani tashkil qilishi mumkin. Yana bir ustun jihati — erta hosil olish imkoni orqali bozorni mavsumning dastlabki bosqichidayoq poliz mahsulotlari bilan ta’minlash va natijada yuqori daromad olishdir.

Vazir, joriy etilayotgan innovatsion yondashuvlar bilan tanishar ekan, ekin maydonlarini kengaytirish, urug‘liklarni parvarishlash jarayonida barcha agrotexnik talablarga qat’iy amal qilish zarurligini ta’kidlab, tegishli tavsiyalar berdi.