O‘zbekiston Respublikasi Qishloq хo‘jаligi vаzirligi

Bugungi kunda agrar sohada faoliyat yuritayotgan tadbirkorlik subyektlari zamonaviy yondashuvlar asosida samarali ish yuritayotgani e’tiborga loyiq. “Gurlan global-teks” agroklasteri bunga yorqin misol bo‘la oladi. Klaster rahbariyati ishlab chiqarish xarajatlarini kamaytirish, maqbul texnologiyalarni to‘g‘ri joylashtirish orqali samaradorlikni oshirish, suv, mineral va mahalliy o‘g‘itlardan oqilona foydalanish hamda har bir gektardan mo‘l hosil olishni asosiy maqsad qilib qo‘ygan.

Klasterda joriy etilgan yangi boshqaruv tizimi orqali ishchi-xodimlarning foydali ish koeffitsienti, qishloq xo‘jaligi texnikalari yordamida kunlik bajarilgan ishlar hamda yoqilg‘i-moylash mahsulotlari sarfi “Exzotron” dasturi orqali onlayn tarzda nazorat qilinmoqda.

Bundan tashqari, klasterga qarashli 685 gektar yer maydonida ekinlar holatini doimiy nazorat qilish zarurati tufayli raqamli monitoring tizimi — Cropwise dasturi asosida tashkil etilgan. Ushbu tizim sun’iy yo‘ldosh ma’lumotlari va dala maydonlariga o‘rnatilgan 33 metrlik minoralardagi yuqori aniqlikdagi kuzatuv kameralari orqali faoliyat yuritadi.

Kameralar 5 kilometrgacha bo‘lgan diametrdagi hududni qamrab olib, agronom va mas’ul xodimlarga real vaqt rejimida ekinlarning o‘sish jarayoni, suv ta’minoti holati, kasallik yoki zararkunanda alomatlarini erta aniqlash, har bir gektar uchun alohida tahlillar olib borish imkonini beradi.

Cropwise dasturining yana bir afzalligi — hosildorlikni oshirish maqsadida ilg‘or algoritmlar yordamida urug‘ va o‘g‘itlarni aniq joylashtirish, resurslarni esa samarali taqsimlash bo‘yicha tavsiyalar berishidir.

Vazir Ibrohim Abdurahmonov tizimning samaradorligini yuqori baholab, bunday ilg‘or yondashuvlarni mamlakatning boshqa hududlarida ham joriy etish zarurligini ta’kidladi. Tashrif davomida agroklaster rahbariyati va mutaxassislari bilan muloqot chog‘ida innovatsiyalar va raqamli yechimlarning qishloq xo‘jaligidagi o‘rni, ularning istiqboli xususida fikr almashildi.

Mazkur tashabbus O‘zbekiston qishloq xo‘jaligini raqamlashtirish, hosildorlikni oshirish va zamonaviy boshqaruv uslublarini joriy etish yo‘lidagi muhim qadam sifatida e’tirof etilmoqda.