O‘zbekiston Respublikasi Qishloq хo‘jаligi vаzirligi

Mazkur paxta dalasiga xorijiy g‘o‘za navi 76/10 sxemasi asosida, qo‘shqator usulda, plyonka ostiga tomchilatib sug‘orish texnologiyasi qo‘llanilgan holda ekilgan. Umuman olganda, bu maydonda “Shinjon” agrotexnologiyasi to‘liq joriy qilingan. Shu bilan birga, yer maydonining bir qismi “xo‘rak maydoni” sifatida ajratilib, u yerga mahalliy “Mehnat” navi ekildi.

Bugungi kunga kelib, daladagi chigitlarning 90 foizi allaqachon unib chiqqan. Mutaxassislar fikricha, qolgan qismi ham yaqin kunlarda unib chiqadi. Bu esa dalaning umumiy holati nuqtai nazaridan juda ijobiy baholanmoqda.

Muhimi shundaki, dalada amalga oshirilayotgan barcha agrotexnik tadbirlar O‘zbekiston Respublikasi Prezidenti huzuridagi Paxtachilik kengashi tomonidan ishlab chiqilgan, genetik jihatdan o‘zgartirilgan xorijiy va an’anaviy mahalliy g‘o‘za navlarini intensiv usulda yetishtirishga doir agrotexnologik qo‘llanmadagi tavsiyalar asosida olib borilmoqda. Mutaxassislar ushbu yondashuv orqali hosildorlik kamida 60–65 sentnerga yetishi mumkinligini ta’kidlashmoqda.

Vazir tashrifi davomida yonma-yon joylashgan yana bir fermer xo‘jaligiga qarashli 4 gektarlik konturni ham ko‘zdan kechirdi. Bu yerda xorijiy navlar xuddi o‘sha 76/10 sxema asosida, biroq bu safar yakkaqator va ochiq usulda ekilgan. Fermerning so‘zlariga ko‘ra, plyonka osti va ochiq usuldagi ikki xil texnologiya qarama-qarshi qo‘yilgan tajriba sifatida sinovdan o‘tkazilmoqda. Maqsad – yangi agrotexnologiyaning hosildorlikka qanday ta’sir ko‘rsatishini ko‘z bilan ko‘rish, real natijalarga tayanib xulosa chiqarishdir.

Gurlan dalasidagi ushbu tajriba – mamlakatimiz qishloq xo‘jaligida innovatsiyalar va ilg‘or texnologiyalarga asoslangan yondashuvlar ortidan kutilayotgan o‘zgarishlarning yorqin bir bo‘lagi, deyish mumkin. Bunday izlanishlar esa nafaqat hosildorlikni, balki fermerlarning bilim va tajribasini ham yuksaltirishga xizmat qiladi.