O‘zbekiston Respublikasi Qishloq хo‘jаligi vаzirligi

Tadbir O‘zbekiston Respublikasi Oliy Majlisi Senatining Agrar, suv xo‘jaligi masalalari va ekologiya qo‘mitasi, Qonunchilik palatasining Ekologiya va atrof-muhitni muhofaza qilish masalalari qo‘mitasi, BMTning Oziq-ovqat va qishloq xo‘jaligi tashkiloti (FAO)ning O‘zbekistondagi vakolatxonasi hamda sohaga aloqador qator vazirlik va idoralar bilan hamkorlikda o‘tkazildi.

Tadbirda ta’kidlanganidek, global miqyosda har yili 7–8 million gektar hosildor yerlar degradatsiyaga uchramoqda. O‘zbekistonda ayrim hududlarda gumus miqdori 40–50 foizgacha kamaygan, bu esa tuproqning biologik faoliyatiga salbiy ta’sir ko‘rsatmoqda.

Konferensiyada ko‘pgina davlatlardan taniqli olimlar va ekspertlar ishtirok etdilar. Ishtirokchilar tomonidan quyidagi ustuvor yo‘nalishlarda fikr va takliflar ilgari surildi:

• Tuproqlarni degradatsiyadan saqlashda raqamli texnologiyalar va monitoring tizimlarini joriy etish;

• “Yashil iqtisodiyot” doirasida yer resurslarini boshqarishning zamonaviy uslublari;

• Organik va uglerodli dehqonchilikka o‘tish orqali ekologik barqarorlikka erishish;

• Qishloq xo‘jaligida resurslar (suv, o‘g‘it, energiya) tejamkor texnologiyalarni ommalashtirish.

Konferensiyada alohida urg‘u berilgan masalalardan biri – oziq-ovqat xavfsizligini ta’minlash va har bir gektar yerdan samarali foydalanishni kuchaytirishdir. Bu Davlatimiz rahbari tomonidan belgilangan 2030-yilgacha bo‘lgan oziq-ovqat xavfsizligi strategiyasi doirasida ustuvor ahamiyatga ega.

Shuningdek, konferensiyaning ikkinchi va uchinchi kunlari Jizzax va Toshkent viloyatlarida ilmiy dala tadbirlari va seminarlar tashkil etildi. “Yashil makon” loyihasi doirasida degradatsiyaga uchragan yer maydonlarida yong‘oq, pista va bodom daraxtlari ekildi. Shuningdek, yosh olimlar ishtirokidagi “Eng yaxshi ilmiy ish” tanlovi o‘tkazildi.