O‘zbekiston Respublikasi Qishloq хo‘jаligi vаzirligi

Tadbirning ochilish marosimida so‘zga chiqqanlar so‘nggi yillarda iqlim o‘zgarishi sharoitida sifatli qishloq xo‘jaligi mahsulotlarini yetishtirish orqali oziq-ovqat xavfsizligini ta’minlashning tobora dolzarb ahamiyat kasb etayotganini ta’kidladilar. Ushbu masalalarni samarali hal qilish, sohaga ilg‘or ishlanmalar va ilm-fan yutuqlarini joriy etish, oliy ta’lim muassasalari va shunga o‘xshash tadbirlarning o‘rni katta ekanligini alohida qayd etdilar.

BMTning Oziq-ovqat va qishloq xo‘jaligi tashkiloti (FAO), Taraqqiyot Dasturi (BMTTD), O‘zbekiston Respublikasi Qishloq xo‘jaligi vazirligi hamda “Qishloq xo‘jaligi oziq-ovqat tizimida inklyuziv yashil iqtisodiyotga o‘tishni qo‘llab-quvvatlash va iqlimga moslashgan o‘zbek qishloq xo‘jaligi bo‘yicha bilim va innovatsiyalar tizimini rivojlantirish” (EUAGRIN) qo‘shma loyihasi hamkorligida tashkil etilgan ushbu tadbir atrof-muhitni muhofaza qilish va yashil iqtisodiyotga bag‘ishlangan. Bu yo‘nalishlar, shuningdek, O‘zbekiston Respublikasi Prezidenti tomonidan 2025-yil “Barqaror rivojlanish yili” deb e’lon qilingani bilan hamohangdir.

Festivalning 24-25 aprel kunlari o‘tkaziladigan dasturida iqlim o‘zgarishi sharoitida iqtisodiyot va jamiyatdagi transformatsiyalar, sun’iy intellekt hamda boshqa texnologiyalarning ta’siri, global muammolar va tendensiyalar haqida seminarlar, munozaralar, ko‘rgazmalar va taqdirlash marosimlari bo‘lib o‘tadi.

“Hayot fanlari-2025” festivalida ishtirokchilar nafaqat seminarlar va munozaralarda ishtirok etishlari, balki laboratoriyalarni ko‘rish, dunyoning turli mamlakatlaridan kelgan chet ellik olimlar bilan muloqot qilish va qiziqarli taqdimotlarda ishtirok etish imkoniyatiga ega bo‘ladilar.