O‘zbekiston Respublikasi Qishloq хo‘jаligi vаzirligi

Xususan, Qoraqalpog‘iston Respublikasiga tashrifi doirasida Qishloq xo‘jaligi vaziri Ibrohim Abdurahmonov tomonidan Beruniy tumanidagi “Niyatulla Azizbek” fermer xo‘jaligi dala shiyponida tashkil etilgan amaliy seminar mazkur islohotlarning amaliy ifodasi bo‘lib xizmat qilmoqda.

Ushbu seminarda Qoraqalpog‘iston Respublikasi va tuman darajasidagi agrar soha rahbarlari, vazirlik tizimidagi tashkilotlar mas’ullari, shuningdek, faol fermerlar va dehqon xo‘jaliklari vakillari ishtirok etdilar.

Seminar avvalida vazirlik tizimiga kiruvchi tashkilotlar vakillari bilan qishloq xo‘jaligining bugungi holati, mavjud resurslardan samarali foydalanish, eksportbop va raqobatbardosh ishlab chiqarish tizimini shakllantirish kabi dolzarb masalalar muhokama qilindi.

Seminar davomida har bir hududdagi agrar muammolarni bevosita joyiga chiqib o‘rganish, ular yuzasidan aniq yechimlar ishlab chiqish va amaliy natijalarga erishish bo‘yicha tegishli vazifalar belgilandi. Hududlarda amalga oshirilayotgan islohotlar samaradorligi chuqur tahlil qilinib, mavjud muammolar va ularning yechimlariga doir vazifalar ko‘rsatib o‘tildi.

Vazir o‘z nutqida qishloq xo‘jaligi bugungi kunda strategik ahamiyatga ega soha sifatida yangicha yondashuvni talab qilayotganini ta’kidladi. Shu bois, har bir tuman va sektor faoliyati ilmiy asoslangan, texnologik va innovatsion yondashuvlarga tayangan holda tashkil etilishi lozimligini qayd etdi.

Suhbatda vertikal boshqaruv tizimi, hududiy bo‘linmalarning yagona boshqaruv zanjiriga asoslanishi, mas’uliyat va natijadorlik tamoyillariga rioya qilgan holda faoliyat yuritishi zarurligi ta'kidlandi.

Vazir, fermerlar va agroklaster rahbarlari bilan muloqotda soha xodimlarining zamonaviy bilimlarga ega bo‘lishi, bozor talablari va global raqobatga tayyor turishi lozimligini alohida qayd etdi. Shuningdek, suv resurslarini oqilona boshqarish, intensiv texnologiyalarni joriy etish va ariq-zovurlarni tartibga keltirish bo‘yicha aniq topshiriqlar belgilandi.

Yig‘ilishda oziq-ovqat xavfsizligini ta’minlash, zaxiralarni hisobga olish va ularni samarali boshqarish masalalari ham muhokama qilindi. Jumladan, “Ombor kitobi” tizimi — oziq-ovqat mahsulotlarining kirim-chiqimini doimiy qayd etish orqali zaxiralarni nazorat qilish mexanizmini joriy etish zarurligi ta’kidlandi.

Bundan tashqari, vazir paxtachilik bo‘yicha Paxtachilik kengashi olimlari tomonidan ishlab chiqilgan uslubiy qo‘llanmalarga qat’iy amal qilish, dala maydonlarida xorijiy navlar uchun xo‘rak maydonlari, mahalliy navlar uchun esa maxsus himoya zonalarini tashkil etish, shuningdek, tomchilatib sug‘orish texnologiyalarini bosqichma-bosqich va tizimli joriy etish bo‘yicha tegishli ko‘rsatmalar berdi.

Ma’lumot uchun, Paxtachilik kengashi olimlari bir hafta davomida Beruniy va boshqa tumanlarda bo‘lib, paxta yetishtirish tajribasini o‘rganadi, agrotexnik yondashuvlarni tahlil qiladi hamda fermer xo‘jaliklariga ilmiy-amaliy ko‘mak ko‘rsatadi. Bu orqali ilmiy yondashuvlarni ishlab chiqarishga tatbiq etish va dala ishlarining samaradorligini oshirish ko‘zda tutilgan.