O‘zbekiston Respublikasi Qishloq хo‘jаligi vаzirligi

Mazkur maydon 11 gektarni egallab, unda ilg‘or agrotexnologiyalar asosida paxta yetishtirish yo‘lga qo‘yilgan. Jumladan, “Sulton” navli paxta 76x10 sxema asosida qo‘shqator tarzda, tomchilatib sug‘orish tizimi orqali plyonka ostiga ekilgan. Bu usul suvni tejash bilan birga, tuproq unumdorligini saqlab qolishda muhim omil sifatida baholanmoqda. Shu bilan birga, maydonda yondosh xo‘rak ekinlari ham yetishtirilmoqda.

Vazir dala holatini batafsil ko‘zdan kechirar ekan, agrotexnik tadbirlar, qo‘llanilayotgan texnologiyalar hamda innovatsion yondashuvlarning amaliyotdagi tatbiqini o‘rganib chiqdi.

Ta’kidlash joizki, joriy yilda ayrim fermer xo‘jaliklari ilk bor plyonka ostida tomchilatib sug‘orish texnologiyasini joriy qilmoqda. Bu esa texnik noaniqliklar va ba’zi kamchiliklarga sabab bo‘lmoqda. Masalan, plyonka qalinligining turlicha bo‘lishi (0,8 mikron va 1 mikron) natijasida nihollar ayrim joylarda teshiklardan emas, balki plyonkaning yon tomonlaridan chiqayotgan holatlar kuzatilmoqda.

Vazir bu muammoga bevosita guvoh bo‘lib, uning asosiy sabablariga e’tibor qaratdi. Shuningdek, nihollar o‘sishiga to‘sqinlik qilayotgan omillarni bartaraf etish, agrotexnik tadbirlarni o‘z vaqtida va to‘g‘ri bajarish bo‘yicha aniq ko‘rsatmalar berdi.

Shundan so‘ng, “Zafarbek Sherembatov” nomli dala maydoni ham ko‘zdan kechirildi. Umumiy maydoni 62 gektarni tashkil etuvchi ushbu hududda ilg‘or “Shinjon” texnologiyasi asosida xorijiy navdagi qishloq xo‘jaligi ekinlari yetishtirilmoqda. Ushbu texnologiya ekinlarning barvaqt va sifatli o‘sishini ta’minlash, suvdan samarali foydalanish hamda yer unumdorligini oshirish imkonini beradi.

Vazir ushbu maydonni ham ko‘zdan kechirar ekan, agrotexnik tadbirlarning ilmiy asosda va o‘z vaqtida bajarilishi muhimligini ta’kidladi. Xususan, tuproqni tayyorlash, urug‘ni to‘g‘ri ekish, sug‘orish, o‘g‘itlash, begona o‘tlar va zararkunandalarga qarshi kurashish kabi jarayonlar zamonaviy yondashuvlar asosida tashkil etilishi, bunda ilm va innovatsiyaga tayanish zarurligi alohida qayd etildi.

Innovatsion yondashuvlarni joriy etishda ularning to‘g‘ri va izchil amalga oshirilishi muhim ahamiyatga ega. Ayrim fermerlarning plyonka ostida ekin yetishtirish texnologiyasini to‘liq o‘zlashtirmagani, texnologik tafsilotlarga yetarlicha e’tibor bermayotgani hosildorlikka salbiy ta’sir ko‘rsatmoqda.

Shu nuqtai nazardan, mavjud yondashuvlarni takomillashtirish, fermerlar bilan tizimli ishlash hamda ularni amaliy mashg‘ulotlar orqali o‘rgatish zarurati tug‘ilmoqda.

Vazir tomonidan berilgan topshiriq va tavsiyalar bu boradagi mas’uliyatni nafaqat fermerlar, balki agrar tizimning barcha bo‘g‘inlari – ilmiy markazlar, tuman agronomlari va qishloq xo‘jaligi bo‘limlari zimmasiga yuklaydi. Zero, innovatsiyalar faqat mas’uliyat bilan uyg‘unlashgandagina kutilgan natijani beradi.