O‘zbekiston Respublikasi Qishloq хo‘jаligi vаzirligi

Yig‘ilishda qishloq xo’jaligi mahsulotlari eksporti hajmini oshirish, ichki bozorni sifatli mahsulotlar bilan ta’minlash hamda tadbirkorlarga yanada kengroq imkoniyatlar yaratishga qaratilgan istiqbolli takliflar muhokama qilindi.

Shuningdek, so‘nggi uch oy mobaynida yo‘lga qo‘yish imkoniyati mavjud bo‘lgan loyihalar va ularni amaliyotga tatbiq etish yuzasidan aniq rejalar ishlab chiqish masalasiga ham alohida e’tibor qaratildi.

Bundan tashqari, ichki resurslardan samarali foydalanish, fermer xo‘jaliklari uchun qulay sharoitlar yaratish, foydalanilmayotgan yaylov va qir-adirlik hududlarida bog‘lar hamda ekin maydonlarini tashkil etish, shu bilan birga, soha mutaxassislarini har tomonlama qo‘llab-quvvatlashga doir kelgusi rejalar belgilab olindi.

Yig‘ilish davomida mas’ullarga organik dehqonchilik, lalmi dehqonchilik va sholichilik yo‘nalishlarida qisqa muddatda natijadorlikni ta’minlaydigan ilg‘or texnologik yondashuvlarni tatbiq etishga yo’nalgan yangi takliflar tayyorlash vazifasi yuklatildi.

Vazir agroinvestitsiyani rivojlantirish, sohaga ixtisoslashgan yangi loyihalar ko‘lamini kengaytirish masalalariga ham alohida to‘xtalib o‘tdi. Xususan, xorijlik investorlar bilan hamkorlik qilishning samarali va zamonaviy mexanizmlarini ishlab chiqish yuzasidan qator topshiriqlar berildi.

Shuningdek, soha xodimlarini qayta tayyorlash, urug‘chilik tizimini yangi bosqichga olib chiqish, agrotexnik amaliyotlarda xalqaro standartlarga mos zamonaviy ko‘nikmalarni joriy etish bo‘yicha ham yangi takliflar tayyorlash vazifasi qo‘yildi.

Bundan tashqari, yig‘ilishda foydalanilmayotgan yaylov va qir-adirliklarni o‘zlashtirishga oid yangi qaror loyihasini ishlab chiqish, o‘zlashtirilgan yerlarda barpo etilgan ekinzorlarning unumdorligini oshirishga xizmat qiluvchi innovatsion yechimlarni joriy etish hamda ushbu jarayonlarni elektron platforma orqali boshqarish masalalari keng muhokama qilindi.

Vazir, shu bilan birga vazirlik huzuridagi Agrosanoatni raqamlashtirish markazi tomonidan ishlab chiqilgan “AgroTarozi” elektron platformasi va uning qulayliklari bilan tanishdi. Uchrashuvda elektron tizim orqali yuzaga keladigan yengilliklar, vaqtinchalik saqlash maskanlariga olib kelingan paxta xom-ashyosiga oid barcha aniq raqamlarni aniqlash texnologiyasi borasida batafsil ma’lumotlar berildi.

Jarayon davomida, mazkur tizimni yanada takomillashtirish, uni amaliyotga tatbiq etishda ilmiy asoslarga ko’ra ish tutish lozimligi tushuntirildi. Yakunda, vazir mas’ullarga yuklatilgan topshiriqlarni o‘z vaqtida va yuqori darajada uyushqoqlik bilan bajarish zarurligini ta’kidlab o‘tdi.