Agrotexnologiyalarni to‘g‘ri va ilmiy asosda qo‘llash — hosil kafolati
2025-04-22 15:25:00 / Yangiliklar
Mazkur dala xorijiy g‘o‘za navini 76/10 sxemasi asosida, yakka qator qilib, plyonka ostiga ekishga yo‘naltirilgan tajribaviy yondashuvni ifodalaydi. Ammo mehnat jarayonida yo‘l qo‘yilgan kichik xatolik — katta saboqni yuzaga chiqardi. Ba’zi nihollar plyonka ostidan chiqa olmagan, o‘suv nuqtalari yopiq holda qolib ketgan. Bu holat esa paxtaning bir maromda unib chiqishiga, nihollarning bir xilda o‘sishiga salbiy ta’sir ko‘rsatishi mumkin.
Vazir mazkur muammoni o‘z vaqtida ko‘zdan kechirdi va bartaraf etish bo‘yicha aniq tavsiyalar berdi. Jumladan, barcha o‘suv nuqtalarini qo‘lda ochib chiqish zarurligi ta’kidlandi. Shu bilan birga, daladagi nihollar sog‘lom unib chiqqani, urug‘lar bir xilda o‘sayotganini alohida e’tirof etdi. Bu esa fermerning mehnatkashligi va agrotexnik tadbirlarni puxta bajarayotganidan dalolatdir.
Biroq, texnologiyada har bir kichik tafsilotning o‘rni bor. Masalan, mazkur dalada 0,5 mikronli plyonkadan foydalanilgan. Aslida esa 1 mikronli plyonka qo‘llanishi lozim edi. Chunki plyonkaning qalinligi — nafaqat tuproqdagi namlikni ushlab qolish, balki teshiklarning o‘z o‘rnini saqlab qolishi, shamolda siljib ketmasligi kabi muhim omillarni belgilaydi.
Bu voqea bir haqiqatni yana bir bor isbotladi: qishloq xo‘jaligidagi muvaffaqiyat — yerga mehr bilan munosabatda bo‘lish, agrotexnologiyalarga e’tibor qaratish, mutaxassis tavsiyalariga amal qilish va har bir tafsilotga mas’uliyat bilan yondashuvdan boshlanadi.
Daladagi har bir qaror, har bir texnologik yechim, har bir o‘lcham — o‘z samarasini beradi. Shu bois, agrotexnologiyalarni to‘g‘ri va ilmiy asosda joriy etish — bu shunchaki tavsiya emas, balki hosil kafolati, mehnat unumdorligi va, eng muhimi, xalq farovonligining poydevoridir.