Qishloq xo‘jaligi vazirligida Koreya kompaniyasi bilan innovatsion loyiha taqdimoti o‘tkazildi
2025-04-22 11:20:00 / Yangiliklar
Uchrashuv davomida ikki tomonlama hamkorlik istiqbollari, xususan, amalga oshirilishi kutilayotgan loyihaning yakuniy konsepsiyasi muhokama qilindi. Loyihaning asosiy maqsadi – qishloq xo‘jaligi yerlari bo‘yicha ma’lumotlarni raqamlashtirish orqali boshqaruv samaradorligini oshirish, sun’iy intellekt va geoaxborot tizimlariga asoslangan monitoring tizimini joriy etishdan iborat.
Koreya delegatsiyasi tomonidan Toshkent viloyatida iqlim o‘zgarishiga moslashtirilgan raqamli qishloq xo‘jaligi platformasini yaratish bo‘yicha loyihaning dizayni, yo‘l xaritasi hamda amalga oshirish bosqichlari taqdim etildi. Shuningdek, loyihani amalga oshirish hududini o‘zgartirish bo‘yicha takliflar bildirildi.
Sun’iy intellekt texnologiyalarini joriy etish, soha mutaxassislarining malakasini oshirish, seminar-treninglar o‘tkazish kabi tashabbuslar ham uchrashuv kun tartibidan o‘rin oldi.
Tomonlar loyihani belgilangan rejaga muvofiq amalga oshirish yuzasidan kelishuvga erishdi.