O‘zbekiston Respublikasi Qishloq хo‘jаligi vаzirligi

Yig‘ilishda viloyat va tuman qishloq xo‘jaligi boshqarmalari rahbarlari, fermerlar, ilg‘or dehqonlar va tajribali mutaxassislar ishtirok etdi.

Bu — shunchaki davra suhbati emas, balki viloyat agrar sektorining istiqbol yo‘nalishlarini belgilab beruvchi strategik maydon bo‘ldi. Yig‘ilish davomida hududda olib borilayotgan islohotlarning amaliy natijalari, mavjud salohiyatni to‘liq ishga solish, qishloq xo‘jaligini zamonaviy, raqobatbardosh va eksportga yo‘naltirilgan tizimga aylantirish masalalari keng qamrovda muhokama qilindi.

Vazir o‘z navbatida, qishloq xo‘jaligi endi oddiy faoliyat emas, balki strategik soha sifatida yangicha yondashuvni talab qilishi, bunda har bir tuman, har bir sektor ilmga asoslangan yondashuv, zamonaviy texnologiyalar, innovatsion g‘oyalar bilan harakat qilishi zarurligi, endi dehqon nafaqat yerga, balki bilim, bozor va global raqobatga ham tayyor bo‘lishi kerakligini qayd etdi.

Tadbirda bog‘dorchilik, chorvachilik, issiqxona xo‘jaliklari, eksportbop mahsulot yetishtirish va uni xorijiy bozorga chiqarish borasidagi ishlar tanqidiy ruhda tahlil qilindi. Suv resurslaridan oqilona foydalanish, intensiv texnologiyalarni joriy etish, agrosug‘urta tizimini takomillashtirish va investitsiya muhitini yaxshilash bo‘yicha dolzarb takliflar bildirildi.

Har bir tuman kesimida mavjud imkoniyatlar, ehtiyojlar va ustuvor yo‘nalishlar asosida maqsadli chora-tadbirlar ishlab chiqilishi zarurligi qayd etildi. Xususan, Oltinko‘l tumanining agroiqtisodiy salohiyati, foydalanilmayotgan yerlar va eksport imkoniyatlari atroflicha muhokama qilindi.

Shuningdek, Prezidentimizning Andijon viloyatiga tashrifi doirasida belgilangan ustuvor vazifalar muhokama etildi. Favqulodda holatlarda ishlash tizimini takomillashtirish, vertikal boshqaruv zanjiri asosida uzviy va aniqlashtirilgan hamkorlikda ishlash mexanizmlarini mustahkamlash zarurligi alohida qayd etildi. Tezkor qaror qabul qilish, resurslarni safarbar etish va muvofiqlashtirish qat’iy tartib asosida olib borilishi kerakligi ta’kidlandi.

Oziq-ovqat xavfsizligini ta’minlash, mavjud zaxiralarni hisobga olish va ularni to‘g‘ri boshqarish masalalari ham e’tibordan chetda qolmadi. Oziq-ovqat mahsulotlari hisobini yuritish balansi (Ombor kitobi) ni yuritish, har bir mahsulot birligi bo‘yicha kirim-chiqimni doimiy qayd etish va zaxiralarni nazoratda ushlab turish — favqulodda holatlarda aholiga uzluksiz ta’minot kafolati bo‘lishi ta’kidlandi.

Xulosa qilib aytganda, ushbu yig‘ilish Andijon viloyatining agrar siyosatini zamon talablari asosida yangilash, har bir dehqon va fermer faoliyatini tizimli qo‘llab-quvvatlash yo‘lida muhim qadam bo‘ldi.

Endilikda har bir rahbar va fermer nafaqat hosil yetishtirish, balki sohaga strategik yondashish, islohotlarni qo‘llab-quvvatlash va barqaror taraqqiyotga erishishni ustuvor vazifa sifatida qabul qilishi lozim.