O‘zbekiston Respublikasi Qishloq хo‘jаligi vаzirligi

Tashrif doirasida afg‘onistonlik mehmonlar O‘zbekiston Respublikasi Qishloq xo‘jaligi vaziri o‘rinbosari vazifasini bajaruvchisi Jamshid Abduzuxurov hamrohligida Toshkent viloyatining Zangiota va Yangiyo‘l tumanlaridagi ilg‘or qishloq xo‘jaligi subyektlari faoliyati bilan tanishdilar.

Xususan, Zangiota tumanida joylashgan “Most Pekar” MCHJ shirinliklar fabrikasiga tashrif chog‘ida delegatsiya a’zolari 200 nafarga yaqin ish o‘rni yaratilgan mazkur korxonaning ishlab chiqarish jarayonlarini ko‘zdan kechirdilar. Ahamiyatlisi, bu yerda foydalanilayotgan xomashyoning 70 foizi mahalliy resurslar hisobidan ta’minlanmoqda, qolgan 30 foizi esa xorijdan olib kelinadi. Bu holat O‘zbekistonda mahalliy resurslardan samarali foydalanish borasidagi amaliy yondashuvni namoyon etadi.

Yangiyo‘l tumanidagi “Saodan Mega Biznes” fermer xo‘jaligi ham delegatsiyada katta taassurot qoldirdi. 6 gektarlik maydonga Ispaniyadan keltirilib, fevral oyida plyonka ostiga ekilgan qulupnay navlari ayni kunlarda iste’molchilarga yetkazilmoqda. Qulupnay yig‘ib olingach, bu yerda bulg‘or qalampiri yetishtirish rejalashtirilgan. Bunday yondashuv yer resurslaridan samarali va uzluksiz foydalanish imkonini beradi. Fermer xo‘jaligida, shuningdek, barra ko‘katlar yetishtirish yo‘lga qo‘yilgan bo‘lib, mahsulotlar to‘g‘ridan-to‘g‘ri Rossiya bozorlariga eksport qilinmoqda.

Delegatsiya tashrifining navbatdagi manzili esa “ProMeat” chorvachilik kompleksi bo‘ldi. Kanada bilan hamkorlikda faoliyat olib borayotgan mazkur zamonaviy majmuada aynan shu davlatdan olib kelingan yuqori mahsuldor zotli qoramollar parvarish qilinmoqda. Afg‘onistonlik mehmonlar, xususan, organik o‘g‘itlarni qayta ishlash texnologiyasiga alohida qiziqish bildirdilar. Mazkur kompleksda ishlab chiqarilayotgan toza organik o‘g‘itlar Birlashgan Arab Amirliklariga eksport qilinishi rejalashtirilgan.

Shuningdek, delegatsiya a’zolari Yuqorichirchiq va O‘rtachirchiq tumanlaridagi qishloq xo‘jaligi obyektlari, urug‘chilik korxonalari, intensiv bog‘ va issiqxonalarda ham bo‘lib, agrar sohaga joriy etilgan ilg‘or texnologiyalar bilan yaqindan tanishdilar.

Ta’kidlash joizki, ushbu tashrif O‘zbekiston va Afg‘oniston o‘rtasidagi o‘zaro manfaatli hamkorlikning amaliy ifodasi bo‘lib, ikki tomonlama munosabatlarning yanada mustahkamlanishiga xizmat qilmoqda. Qishloq xo‘jaligi sohasida ilg‘or tajribalarni o‘rganish, ishlab chiqarish va eksport salohiyatini kengaytirish yo‘lidagi bunday tashriflar mintaqaviy oziq-ovqat xavfsizligini ta’minlash hamda iqtisodiy integratsiyani chuqurlashtirishda muhim ahamiyat kasb etadi.