O‘zbekiston Respublikasi Qishloq хo‘jаligi vаzirligi

15 gektar hududni o‘z ichiga olgan ushbu maydon bugun innovatsion yondashuvlarning yorqin namunasi sifatida e’tiborni tortmoqda. Xitoyning “Xin Lu Zao 52” g‘o‘za navi bu yerda 76x10 sxema asosida, plyonka ostida, yakkaqator usulida ekilgan. Bunday ekish texnologiyasi an’anaviy usuldan ko‘ra ancha murakkab va mas’uliyatli ko‘rinadi, ammo ayni damda hosildorlik va sifat borasida ancha yuqori natijalarni kafolatlaydi. Dalada maxsus xo‘rak maydonlari ham tashkil etilgan bo‘lib, g‘o‘zaning rivojlanishi va himoyasini to‘g‘ridan-to‘g‘ri nazorat qilish imkonini beradi.

Hozirgi vaqtda ushbu yerda zarur agrotexnik tadbirlar izchil va bosqichma-bosqich amalga oshirilmoqda. Har bir harakat, har bir agro-amaliyot puxta rejalashtirilgan va samaradorlikka yo‘naltirilgan.

Ma’lumot o‘rnida, Xo‘jaobod tumanining 430 gektar yerida tomchilatib sug‘orish texnologiyasi asosida xorijiy g‘o‘za navlari yetishtirilmoqda. Bu usul suv resurslarini tejashda, paxtalarga aniq va me’yorida suv yetkazishda nihoyatda foydali hisoblanadi. Shuningdek, tumanning 130 gektar maydonida “Shinjon” agrotexnologiyasi asosida paxta ekilgan.

Bugun paxtachilik nafaqat iqtisodiy soha, balki milliy farovonlik kalitiga aylangan. Iqlim o‘zgarishi, suv tanqisligi kabi global muammolar fonida, har bir texnologik yangilik — bu sohani kelajakka olib boradigan ko‘prikdir. Yangi yondashuv shuni ko‘rsatadiki, zamonaviy agrotexnologiyalar hosildorlikni karrasiga oshirishga xizmat qiladi.

Demak, bugun paxtachilikda raqamlar emas, yondashuvlar hal qiluvchi ahamiyatga ega bo‘lib bormoqda. Har bir yangi g‘o‘za navi, har bir agrotexnologiya ortida esa mehnat, bilim va islohot yotibdi.

Xo‘jaoboddagi dalalarda esa bu islohotlarning mevasi asta-sekin namoyon bo‘lmoqda.