Investitsiya loyihalari soha rivoji uchun muhim ahamiyat kasb etadi
2025-04-11 12:00:00 / Yangiliklar
30 gektarlik ushbu maydonga g‘allaning “Alekseyevich” elita navi ekilgan bo‘lib, Eron texnologiyasi asosida yomg‘irlatib sug‘orish tizimi joriy etilgan. Fermer xo‘jaligi rahbari Mayram Aripova eronlik olimlar jamoasi bilan bir necha yillardan buyon samarali hamkorlik qilib kelmoqda. Xususan, in-vitro laboratoriyasini ishga tushirish, ona bog‘larini yaratish, mevali ko‘chatlar va kartoshka navlarini shu laboratoriyada yetishtirish rejalashtirilgan.
Ma’lumot o‘rnida: fermer xo‘jaligining umumiy yer maydoni 67,9 gektarni tashkil etadi. Shundan 63,3 gektari ekin maydonlari bo‘lib, 10 gektarida paxta, 30 gektarida g‘alla yetishtiriladi, 18,3 gektarida esa bog‘ va uzumzorlar barpo etilgan.
G‘allachilik yo‘nalishida amalga oshirilayotgan islohotlar natijasida, bugungi kunga kelib viloyatda 65 ming gektar yerda 10 ta klaster korxonasi faoliyat yuritmoqda. Ular uchun 3,4 ming gektar yer to‘g‘ridan-to‘g‘ri ajratilgan bo‘lsa, yana 61,6 ming gektar g‘alla maydoni 3 mingga yaqin fermer xo‘jaliklariga biriktirilgan. Bu esa xo‘jaliklarning moddiy manfaatdorligini oshirib, xalqimiz dasturxonining to‘kinligini ta’minlashda muhim omil bo‘lmoqda.
Tanishuv davomida vazir shu yerning o‘zida Eron hamda Niderlandiya vakillari bo‘lgan tadbirkorlik subyektlari bilan muzokaralar olib bordi. Uchrashuvda in-vitro laboratoriyasini tashkil etish, yangi onalik bog‘larini yaratish hamda 100 gektarlik intensiv bog‘ni barpo etish masalalari muhokama qilindi.
Vazir in-vitro laboratoriyasini oliy ta’lim muassasasi huzurida tashkil etish bo‘yicha aniq takliflar bildirdi. Bu g‘oya eronlik olim va tadbirkor tomonidan qo‘llab-quvvatlandi. Tadbirkor laboratoriyani barpo etish uchun shaxsiy sarmoya kiritishni taklif etdi. Shuningdek, bog‘lar yaratish loyihasini investitsiya dasturi doirasida amalga oshirish yuzasidan kelishuvga erishildi. Niderlandiyalik tadbirkor esa ushbu loyihalarda o‘z texnik jihozlari va investitsiyasi bilan ishtirok etishga tayyorligini bildirdi.
Ta’kidlash joizki, ishchi tashrif davomida o‘tkazilgan muloqotlar bajarilishi rejalashtirilgan ishlar va ustuvor yo‘nalishlarni aniqlashtirib berishi bilan birga, joyida taqdimotlar o‘tkazilishi orqali tushunarlilikni oshiradi. Bu esa sarmoyani qaysi yo‘nalishga yo‘naltirish bo‘yicha aniq qaror qabul qilishga yordam beradi.