O‘zbekiston Respublikasi Qishloq хo‘jаligi vаzirligi

Mazkur hududda g‘o‘zaning xorijiy navlari yangicha texnologik yondashuvlar asosida ekilgan bo‘lib, ayni paytda uni parvarishlash ustida ish olib borilmoqda. Biroq kuzatuvlar jarayonida shunisi ayon bo‘ldiki, dalada ekinlar uchun alohida maxsus himoya zonalari, ya’ni xo‘rak maydonlari tashkil etilmagan. Bu uchun qo‘shimcha egatlar ajratilmagan.

Ma’lumki, fermer va dehqonlar uchun ishlab chiqilgan uslubiy qo‘llanmada xorijiy navlarni ekish va yetishtirishda to‘g‘ri yondashuvlarni qo‘llash, chigitlarni turli tashqi ta’sirlardan, jumladan, ko‘sak qurti va shunga o‘xshash zararkunandalar xavfidan omon saqlash uchun dala hududining 10 foizigacha bo‘lgan yerlarda maxsus xo‘rak maydonlarini tashkil etish, u yerda mahalliy navlarni ekish borasida ko‘rsatmalar berilgan.

Shuningdek, bu jarayonda qilinishi lozim bo‘lgan agrotexnik amaliyotlar, maxsus maydonda ekilgan mahalliy navlarni to‘g‘ri taqsimlash, xorijiy urug‘larni mazkur himoya usullari yordamida sog‘lom rivojlantirish, sug‘orish va oziqlantirishda e’tibor qaratish shart bo‘lgan jihatlar ham ushbu qo‘llanmada batafsil keltirilgan.

Vazir hududdagi ayni vaziyatni ko‘zdan kechirar ekan, mas’ullarga uslubiy qo‘llanmadan foydalanishda sustkashlikka yo‘l qo‘ymaslikni, agarda e’tiborsizlik ortsa, buning oqibatida kutilgan hosildorlikka erishish imkoniyati yo‘qqa chiqishini tushuntirdi va tajribali mutaxassislarni jalb qilgan holda hududda xo‘rak maydonlarini tezroq tashkil etishga doir vazifalar tayinladi.

Shu bilan birga, o‘g‘itlardan to‘g‘ri va maqsadli foydalanish bo‘yicha tavsiyalar berib, Paxtachilik kengashi olimlari tomonidan bildirilgan e’tirozlardan to‘g‘ri xulosa chiqargan holda agrotexnik amaliyotlarni xorij texnologiyasi asosida bosqichma-bosqich tashkil etish yuzasidan topshiriqlar berdi.