Buxoro: qishloq xo‘jaligini rivojlantirish – taraqqiyot sari muhim qadam
2025-04-11 11:30:00 / Yangiliklar
40 gektar maydonni egallagan hudud paxta ekishga mo‘ljallangan bo‘lib, shundan 31 gektariga mart oyining oxirgi kunida ochiq usulda mahalliy “Porloq” navi g‘o‘zasi ekilgan. Nihollar bir tekis unib chiqib, baravj rivojlanmoqda. Qolgan 9 gektar yerga esa baraka urug‘lari plyonka ostiga ekilmoqda. Bundan tashqari, yana 2 gektar yer maydonida xorijiy g‘o‘za navlari zamonaviy agrotexnologiyalar asosida ekilgan.
Vazir Ibrohim Abdurahmonov dala maydonidagi ishlar bilan tanishar ekan, unib chiqqan nihollarni parvarishlash va hosildorlikni oshirishda yangi agrotexnologiyalarning ahamiyati borasida o‘z fikrlarini bildirdi.
Ta’kidlash joizki, tajribali fermer xo‘jalikning yer maydonlarida paxtadan tashqari kartoshka, piyoz kabi sabzavotlar hamda poliz ekinlarini yetishtirishni ham yo‘lga qo‘ygan. Shuningdek, ixcham tarzda barpo etilgan bog‘da mevali daraxtlar qiyg‘os gullagan.
Fermer bilan bo‘lgan suhbat chog‘ida vazir xo‘jalik yerlaridan, ariqlar va dala chetlaridan samarali foydalanilayotganini yuqori baholar ekan, haqiqiy dala madaniyatini shakllantirish hamda dala chetlarida yashil himoya qo‘rg‘onlarini yaratish bo‘yicha tavsiyalarini berdi.
“Mehnat qilgan – elda aziz” degan xalqimiz donishmandlaridan meros bo‘lgan ibora bugungi kunda yurtimiz qishloq xo‘jaligi sohasiga to‘la mos keladi. Darhaqiqat, “O‘ktam Ibrohim To‘qli” fermer xo‘jaligi rahbari kabi fidokor insonlar mehnati evaziga dasturxonlar obod, xonadonlar farovon bo‘lmoqda. Ularning harakatlari nafaqat mahallada, balki jamiyatda ham e’tirof etilmoqda.