Dala yerlarida himoya zonalarini tashkil etish ekin sifati va hosildorligiga ijobiy ta’sir ko‘rsatmoqda
2025-04-10 20:25:00 / Yangiliklar
Umumiy maydoni 12 gektardan iborat bo‘lgan ushbu hududda xorijiy “Xin Lu Zao-57” navi Xitoy texnologiyasi asosida qo‘shqator tarzda, 76/10 sxema bo‘yicha ekilgan. Ahamiyatlisi, tomchilatib sug‘orish tizimi to‘liq va sifatli yo‘lga qo‘yilgan.
Ta’kidlanishicha, dala ishlarining barchasi fermer va dehqonlar uchun ishlab chiqilgan uslubiy qo‘llanma asosida tashkil etilgan bo‘lib, bu jarayonga olimlar hamda soha mutaxassislarining ishtiroki to‘liq ta’minlangan. Parvarishlash amaliyoti esa tizimli va ilmiy asosda yo‘lga qo‘yilgan.
Ma’lum bo‘lishicha, mazkur hududda ekilgan xorijiy g‘o‘za navlari urug‘lik paxta yetishtirishga mo‘ljallangan. Vazir, ushbu holatni inobatga olgan holda, ekin maydonlari atrofida to‘liq himoya zonalarini tashkil etish, bu yerda oq jo‘xori va kungaboqar kabi o‘simliklarni ekib, parvarishlash bo‘yicha tegishli topshiriqlar berdi.
Shuningdek, vazir yetishtirilayotgan paxtani turli iqlimiy omillar va tashqi ta’sirlardan himoyalashda bunday himoya zonalarining muhim ahamiyat kasb etishini ta’kidladi. Ayniqsa, urug‘lik chigit parvarishi uchun bunday yondashuv birlamchi va ustuvor masala ekanini qayd etdi.
Bundan tashqari, mas’ullarga mavsum davomida dala ishlarini sifatli tashkil etish, ekinlarni oziqlantirishda belgilangan me’yorlarga rioya qilish hamda agrotexnik amaliyotlarga ilmiy asoslangan yondashuvni doimiy joriy etib borish bo‘yicha ko‘rsatmalar berdi.