O‘zbekiston va YeTTB: agrar sohadagi hamkorlik kuchaytiriladi
2025-04-04 11:05:00 / Yangiliklar
Muloqot chog‘ida barqaror qishloq xo‘jaligi va iqlim o‘zgarishiga qarshi kurashish yo‘nalishlarida hamkorlikni kengaytirish masalalari atroflicha muhokama qilindi. Xususan, tomonlar O‘zbekiston uchun iqlim o‘zgarishining qishloq xo‘jaligiga ta’sirini baholovchi "Country Platform" (Milliy platforma)ni ishlab chiqish va unga asoslangan konsepsiyani tayyorlash bo‘yicha fikr almashdi.
Uchrashuvda suv va yer degradatsiyasi, yerlarning melioratsiyasi, oziq-ovqat sanoatiga investitsiyalar jalb qilish, kadastr tizimini takomillashtirish va yer resurslaridan noto‘g‘ri foydalanish kabi muhim masalalarga e’tibor qaratildi.
Shuningdek, qishloq xo‘jaligi mahsulotlari yo‘qotilishi, ularning qiymat zanjirida yuzaga kelayotgan isrofgarchilik holatlari ham muhokama markazida bo‘ldi. Qayd etilishicha, O‘zbekistonda har yili 24 million tonnadan ortiq sabzavot yetishtiriladi, biroq undan atigi 3,5 million tonnasi eksport qilinadi, qolgan qismi esa to‘liq qiymat zanjiriga kiritilmay, yo‘qotishga uchraydi.
Shu kabi holatlarni inobatga olgan holda, vazir Milliy platformani ishlab chiqishda texnik ekinlarni rivojlantirish, agrostartaplarni qo‘llab-quvvatlash, suvni tejovchi texnologiyalarni keng joriy etish zarurligini ta’kidladi. Shuningdek, fermerlar uchun paxta poyalarini qayta ishlash orqali "Biochar" texnologiyasini rag‘batlantirish taklifi ilgari surildi.
YeTTB vakillari ushbu platforma fermerlar va oziq-ovqat zanjirlariga moliyaviy ko‘mak berish, tuproq degradatsiyasi va yerlarni tiklash uchun tayyor investitsion paketlar ishlab chiqish, infratuzilma va logistika tizimlarini rivojlantirish orqali resurslarga kirishni yaxshilash, qonunchilikdagi islohotlar va salohiyatni oshirish orqali barqaror agro-biznesni rivojlantirish kabi muhim jihatlarni qamrab olishi lozimligini ta’kidladi.
Uchrashuv davomida YeTTB tomonidan tez orada rasmiy takliflar paketi taqdim etilishi ma’lum qilindi. Shuningdek, issiqxonalar tarmog‘ini rivojlantirish va Markaziy Osiyo mamlakatlari o‘rtasidagi mintaqaviy hamkorlikni yanada kuchaytirish masalalari ham muhokama qilindi.