G’o’za navlarini ekishda xorij tajribasidan unumli foydalanish natijadorlikni ta’minlaydi
2025-03-29 18:10:00 / Yangiliklar
25 gektar hududni qamrab olgan ushbu maydonda Xitoyning “Xin liu Zao 52” g‘o‘za navi Xitoy texnologiyasi asosida ekilgan bo‘lib, hozirda parvarishlash bo‘yicha zarur agrotexnik tadbirlar bosqichma-bosqich amalga oshirilmoqda.
Mutaxassislarning ta’kidlashicha, chigit ekish 76/10 sxemasi bo‘yicha, Shinjon tajribasiga mos ravishda tashkil etilgan. Shu maqsadda dalaga qo‘shimcha 25 ta seyalkalar keltirilib, amaliyotga tatbiq etilgan. Bundan tashqari, navlarni qo‘sh-qator qilib, plyonka ostida ekish bo‘yicha innovatsion yondashuvlar qo‘llanmoqda.
Vazir xo‘jalik faoliyati bilan tanishar ekan, avvalo, dala madaniyatini shakllantirish va maydon chetlaridan samarali foydalanish bo‘yicha aniq vazifalar belgilab berdi. Shuningdek, xorijiy tajribani to‘g‘ri va tizimli joriy etish, ishlatilayotgan plyonkalar sifatiga alohida e’tibor qaratish lozimligini ta’kidladi.
Bundan tashqari, dala atrofidagi ariq va zovurlarni muntazam toza saqlash, ortiqcha chiqindilarni bartaraf etish hamda bo‘sh turgan maydonlardan unumli foydalanib, hosildorlikni oshirish bo‘yicha tegishli topshiriqlar berildi.
Shuningdek, vazir ayni tumandagi o’rdakchilikka ixtisoslashgan yangi markaz faoliyati bilan ham tanishdi. Ma’lum bo’lishicha, umumiy 2 gektar maydonda hozirda 150 ta o’rdak parvarishlash qilinmoqda. Tadbirkorning aytishicha, hududda joriy etilishi ko’zda tutilgan keng ko’lamli loyiha to’laqonli ishga tushgandan so’ng 5-6 ming o’rdakni boqish imkoniyati yuzaga keladi.
Vazir ushbu loyiha bilan tanishar ekan, mahalliy tadbirkorlarni qo‘llab-quvvatlash va o‘rdakchilikni yanada rivojlantirish borasida o‘z fikrlarini bildirdi. Shu bilan birga, loyihani intensiv usullar bilan rivojlantirish, zamonaviy texnologiyalarni keng joriy etish va bu yerda ham Oqqo’rgon tajribasini to’laqonli joriy etish taklifini aytib o’tdi.