Yangi texnologiyalar – yuqori hosildorlik garovi
2025-03-25 13:25:00 / Yangiliklar
Mazkur tadbirda paxtachilikda hosildorlikni oshirish, zamonaviy texnologiyalarni joriy etish hamda ekin maydonlaridan samarali foydalanish masalalari muhokama qilindi.
Seminar davomida vazir g‘o‘za ekish jarayonida ilg‘or agrotexnik tadbirlarning ahamiyati, mahalliy va xorijiy navlarning hosildorlikka ta’siri, tuproq unumdorligini oshirish va resurslarni tejash masalalariga alohida e’tibor qaratdi.
Shuningdek, ilmiy yondashuv asosida amalga oshirilayotgan texnologik yangiliklar, jumladan, suv tejovchi sug‘orish tizimlari, yuqori samarali mineral o‘g‘itlardan foydalanish, zararkunandalarga qarshi biologik kurashish usullari bo‘yicha tavsiyalar berildi.
Xususan, xorijiy seleksiya asosida yaratilgan urug‘larning afzalliklari ham muhokama markazida bo‘ldi. Ta’kidlanishicha, zamonaviy seleksiya texnologiyalari asosida yetishtirilgan g‘o‘za navlari yuqori hosildorlik, kasallik va zararkunandalarga chidamlilik, kam suv talab qilish kabi xususiyatlari bilan ajralib turadi. Ko‘plab xorijiy seleksionerlar tomonidan ishlab chiqilgan navlar mahalliy sharoitga moslashtirilib, fermerlar uchun tavsiya etilmoqda.
Bundan tashqari, past sifatli tuproqlarda ham yaxshi hosil beradigan hamda o‘g‘it va suvga ehtiyojni kamaytiruvchi texnologik yangiliklar fermerlarga tanishtirildi. Shuningdek, ilg‘or genetik usullar asosida hosildorlikni oshirish va mahsulot sifatini yaxshilashga qaratilgan innovatsiyalar ham muhokama qilindi.
Seminar yakunida fermer va agrar soha vakillari o‘zlarini qiziqtirgan savollarga javob oldilar hamda sohaga oid dolzarb muammolar muhokama qilindi.
Ta’kidlash joizki, zamonaviy qishloq xo‘jaligi tizimida innovatsiyalar muhim ahamiyat kasb etadi. Fermerlarning ilg‘or texnologiyalar va ilmiy yondashuv asosida faoliyat yuritishi yuqori hosildorlik garovidir.
Mazkur seminar qishloq xo‘jaligi sohasida ilg‘or tajribalarni ommalashtirish, hosildorlik va mahsulot sifatini oshirishga xizmat qiladigan innovatsion texnologiyalarni keng joriy etish maqsadida tashkil etildi.