Qishloq хo‘jaligi ekinlari urug‘chiligi sohasida elektron tanlovlar yo‘lga qo‘yilmoqda
2025-03-19 16:00:00 / Yangiliklar
O‘zbekiston Respublikasi Vazirlar Mahkamasining “Qishloq xo‘jaligi ekinlari urug‘chiligi sohasida “E-urug‘” axborot tizimini joriy etish chora-tadbirlari to‘g‘risida” 2025-yil 18-martdagi 166-son qarori qabul qilindi.
Qarorga muvofiq:
Qishloq xo‘jaligi vazirligining “Raqamli qishloq xo‘jaligi” yagona integratsion platformasi tarkibida “E-urug‘” axborot tizimi joriy etish;
Original, elita va keyingi avlodlarga mansub urug‘lik qishloq xo‘jaligi ekinlarini yetishtirish huquqiga ega bo‘lish uchun urug‘lik yetishtiruvchi subyektlar o‘rtasida tanlov jarayonlari “E-urug‘” axborot tizimida o‘tkazish;
Urug‘chilik xo‘jaliklarini tender asosida tanlab olishda ishtirok etadigan tender komissiyasi tomonidan beriladigan qog‘oz ko‘rinishidagi hujjatlarni tugatish;
Komissiya tomonidan berilgan ballarni manfaatdor vazirliklar, idoralar va tashkilotlar bilan integratsiya natijasida olinadigan ma’lumotlarga asoslanib reyting ball shakllantirish;
“E-urug‘” axborot tizimida tanlovlarni tashkil etish hamda o‘tkazish;
Tanlov g‘oliblari “E-urug‘” axborot tizimi joriy dasturi tomonidan avtomatlashtirilgan holda aniqlanishi belgilangan.
Tanlovlarda ishtirok etish masalalarida “E-urug‘” axborot tizimining huquqiy operatori – Qishloq xo‘jaligi vazirligi huzuridagi Urug‘chilikni rivojlantirish markazi (tel.: +998 71 203-0525 (2011 yoki 212)) va tizimning texnik operatori – Vazirlik huzuridagi “Agrosanoatni raqamlash-tirish markazi” MChJ (tel.: 71 206-7007) bilan bog‘lanish mumkin.