Sevimli sitrus: Apelsin daraxti qanday parvarishlanadi?
2025-03-18 18:05:00 / Yangiliklar
Daromad manbai bo’lmish apelsin daraxti asosan kuz yoki bahor faslida ekiladi. Uni quyosh nuri va kuchli shamoldan muhofazalagan holda parvarish qilinsa mahsuldorligi ortadi. Biroq, kuchli sovuq harorat ham uning sifatiga, unib-o’sishiga salbiy ta’sir ko’rsatishi mumkin. Uni yetishtirishda professional yondashilsa, daraxt 75 yildan ortiq yashaydi va hosil beradi.
Apelsin shox-shabbali yoyiq daraxt bo’lgani uchun yetishtirish davrida undagi zaif novdalarni muntazam kesib turish talab etiladi. Ba’zi dehqonlar bu borada xatolikka yo’l qo’yib, kesish kerak bo’lmagan sog’lom shoxlarni tajribasizlik sabab o’lik holatga keltirishadi. Apelsin hosil berar ekan, uning o’rta qismidagi qurigan va zaif novdalarigina tozalanishi kerak.
Ushbu daraxt har yili mo‘l hosil beradi, mevalari asosan oktabr-noyabr oylarida pishadi. Biroq, daraxtni zararkunandalar, xususan, qizil o’rgimchaklardan doimiy himoya qilinmasa mevalarga ziyon yetishi tayin. Chunki bu o’rgimchaklar hosildorlik davrida daraxtni turli kasalliklarga yo’liqtirishi mumkin.