O‘zbekiston-Tojikiston hamkorligi: kelgusi rivojlanish yo‘nalishlari muhokama qilindi
2025-03-12 16:30:00 / Yangiliklar
Muloqot davomida ikki davlat o‘rtasidagi savdo-iqtisodiy hamkorlik, amalga oshirilayotgan ishlar va istiqbolli loyihalar muhokama qilindi. Xususan, qishloq xo‘jaligi sohasida kelgusida amalga oshirilishi rejalashtirilgan loyihalar bo‘yicha fikr va takliflar tinglandi.
Uchrashuvda paxtachilik va urug‘chilik yo‘nalishlaridagi hamkorlik tahlil qilinib, kelajak rejalari yuzasidan takliflar almashildi. Shuningdek, ikki davlat mutaxassislari ishtirokida qo‘shma seminarlar tashkil etish hamda o‘zaro tajriba almashish imkoniyatlarini kengaytirish masalalari ko‘rib chiqildi.
Qishloq xo‘jaligi mahsulotlarining eksport-import masalalariga ham alohida e’tibor qaratilib, mavjud salohiyatni yanada oshirish zarurligi ta’kidlandi. Shu bilan birga, qishloq xo‘jaligini mexanizatsiyalashtirish, jumladan, texnika ishlab chiqarish va uni eksport qilish imkoniyatlari yuzasidan fikr almashildi.
Uchrashuv yakunida vazir Ibrohim Abdurahmonov ikki tomonlama hamkorlikni rivojlantirishga tayyor ekanini bildirdi hamda mas’ul shaxslarga bu borada zudlik bilan amaliy ishlarni boshlash bo‘yicha tegishli topshiriqlar berdi.