O‘zbekiston Respublikasi Qishloq хo‘jаligi vаzirligi

Fermer xo‘jaliklari vakillari bilan ochiq muloqot tarzida o‘tkazilgan yig‘ilishda Ibrohim Ergashev dala chetlaridan samarali foydalanish, u yerda achchiq gilos, behi va olxo‘ri kabi mevali daraxt ko‘chatlarini yetishtirish hamda mahallalarda “Bir kontur – bir mahsulot” tamoyili asosida agrotexnik amaliyotlarni amalga oshirish haqida tushuntirish berdi. Shuningdek, bu jarayonda Armaniston va Afrika tajribasidan foydalanish mexanizmlari ham muhokama qilindi.

Shu bilan birga, tomorqa va ijara yerlarida ekin ekmagan yoki qarovsiz qoldirgan fermerlarga nisbatan yangi choralar qo‘llanilishi belgilangan. Uchrashuvda aynan shu masalaga alohida e’tibor qaratilib, bunday fermerlarga imtiyozli kreditlar ajratilmasligi va belgilangan yer solig‘i uch baravar oshirilishi ta’kidlandi. Shu sababli har bir qarich yerdan samarali foydalanish va ishga mas’uliyat bilan yondashish muhimligi qayd etildi.

Shundan so‘ng, vazir fermerlarga ichki ariq va zovurlarni tozalash, urug‘lik chigitni tayyorlash bo‘yicha olib borilayotgan ishlarni izchil davom ettirish, chigitlarni belgilangan miqdorda yetkazish va mavsumga qadar zarur ishlarni tizimli tashkil etish bo‘yicha topshiriqlar berdi.

Seminar-trening davomida yangi agrotexnologiyalarni keng qo‘llash hamda zamonaviy ilmiy yondashuvlarni an’anaviy dehqonchilik uslublari bilan uyg‘unlashtirish orqali hosildorlikni oshirish mumkinligi ta’kidlandi. Bunga erishish uchun ilmga asoslangan holda vijdonan mehnat qilish lozimligi aytib o‘tildi.

Seminar-treningdan so‘ng tashkil etilgan sayyor qabulda fermer va dehqonlarning huquqlarini himoya qilish, ularning mehnat sharoitlarini yaxshilash, ishlab chiqarish samaradorligini oshirish va mavjud muammolarni hal etish bo‘yicha aniq yechimlar berildi. Sayyor qabul davomida har bir muammo individual tartibda ko‘rib chiqilib, tizimli yondashuvlar asosida ko‘plab masalalar hal etildi.

Vazir ishtirokchilarning barcha savollariga javob berar ekan, davlatimiz rahbari tomonidan imzolangan yangi qaror va farmonlar fermerlar hamda dehqonlarning huquqlarini himoya qilish, mehnat sharoitlarini yaxshilash va ishlab chiqarish samaradorligini oshirishga xizmat qilishini alohida ta’kidladi.