“Gulfood – 2025”: Oʻzbekiston mahsulotlari endi dunyo bozorida
2025-03-03 21:00:00 / Yangiliklar
Tashrif doirasida 12 ta korxona egalari Kuvaytning yirik supermarket tarmoqlari bilan hamkorlik qilish boʻyicha kelishuvlarga erishdi. Bundan tashqari, Oʻzbekistonning oziq-ovqat mahsulotlari eksportini kengaytirish, qishloq xoʻjaligi sohasida innovatsion loyihalarni amalga oshirish va logistika imkoniyatlarini rivojlantirish boʻyicha bir qator muhim kelishuvlar imzolandi.
Xususan, “Unifrutti Group” bilan meva-sabzavot mahsulotlarini qayta ishlash, “Mokhsir” kompaniyasi bilan texnik kannabis yetishtirish, “Eco Garden” kompaniyasi bilan sanoatlashgan intensiv bog‘larni tashkil etish va "ICBA" bilan Qoraqalpog‘istondagi loyihalarni kengaytirish boʻyicha hamkorlik kelishuvlariga erishildi. Ko‘rgazma davomida BAAda Oʻzbekiston mahsulotlarini eksport qilish va logistika jarayonlarini osonlashtirish uchun “SURA trade” onlayn platformasi taqdim etildi.
Bundan tashqari, Ras Al-Xayma amirligidagi logistika markazida Oʻzbekiston mahsulotlari uchun savdo tarqatish markazini tashkil etish boʻyicha muzokaralar oʻtkazildi. Amirlik tomoni bir yil davomida Oʻzbekiston mahsulotlari uchun omborxona xizmatlarini bepul taqdim etishga tayyorligini bildirdi.
Shuningdek, 20-fevral kuni Dubay shahrida Oʻzbekiston elchixonasi va Bosh konsulxonasi koʻmagida Markaziy Osiyo va BAA oʻrtasida oziq-ovqat savdosi va transport imkoniyatlariga bagʻishlangan xalqaro biznes-forum tashkil etildi. Unda eksportni rivojlantirish, toʻlov mexanizmlari va logistik yechimlar boʻyicha muhokamalar oʻtkazildi hamda yangi hamkorlik shartnomalari imzolandi.
Videoni tomosha qilish: https://youtu.be/jXl_wHWECnA