O‘zbekiston Respublikasi Qishloq хo‘jаligi vаzirligi

Qishloq xo‘jaligi vazirligi O‘zbekiston Respublika tovar-xomashyo birjasi bilan birgalikda paxta xom ashyosini birja savdolarida fyuchers, forvard va spot shartnomalarini tuzish orqali sotish mexanizmlarini bosqichma-bosqich joriy etmoqda.

Shu bilan birga, fermer xo‘jaliklarida joriy yildan boshlab paxta xom ashyosini birja savdolari orqali tuziladigan yangi turdagi forvard shartnomalari asosida yetkazib berish imkoniyati mavjud.

Bunda, fermer xo‘jaliklari forvard shartnomalarini tuzish uchun Qishloq xo‘jaligi vazirligining “CropAgro” axborot tizimi (https://cabinet-crop.agro.uz/) dagi kabinetga kirgan holda, “Kutilayotgan hosildorlik bo‘yicha forvard shartnomasini tuzish” tugmasi bosiladi va kutilayotgan hosildorlik kiritiladi va saqlash tugmasini bosish yetarli. Ma’lumotlar Birjaning axborot tizimiga integratsiya orqali yuboriladi.

Savdoga chiqariladigan va tonnalarda ko‘rsatilgan miqdor avval birjada sotilgan fyuchers shartnomasidagi miqdor asosida avtomatik tarzda hisoblab ko‘rsatiladi.

Forvard shartnomasi bo‘yicha paxta xom ashyosi xo‘jaliklarning o‘z mablag‘lari yoki tijorat kreditlari hisobiga yetishtiriladi.

Forvard shartnomalari xo‘jalik va qayta ishlovchilar o‘rtasida o‘zaro kelishilgan narxda tuziladi, ya’ni fyuchers shartnomalari uchun belgilangan boshlang‘ich narxlardan tashqarida tuzilishi mumkin.

Shuningdek, paxta xom ashyosini o‘z mablag‘lari va tijorat kreditlari hisobidan yetishtirib, birjada sotgan xo‘jaliklarga shakllangan hisobvaraq-faktura qiymatining 10 foizi miqdorida subsidiya ajratilishi belgilangan.