Xorazm: viloyatda kuzgi bug‘doy ekish ishlari jadallik bilan davom etmoqda
2024-09-12 16:20:00 / Yangiliklar
Ayni paytda ishchi tashrif bilan Xorazm viloyatida bo‘lib turgan Qishloq xo‘jaligi vaziri Ibrohim Abdurahmonov ham mana shunday kuzgi bug‘doy ekish ishlari bilan tanishish maqsadida Xonqa tumani "Tomodurgadik” hududida joylashgan “Vaisyoz Qaxramon” fermer xo‘jaligi dala maydonida bo‘ldi.
Albatta, erta muddatlarda ekilgan bug‘doy qishgacha yaxshi tuplaydi, 4-5 ta poya hosil qiladi, ildiz otadi, sovuqdan zararlanmaydi, bahorda tez rivojlanib, yuqori hosil olish imkonini beradi.
Vazir ham o‘z navbatida baraka urug‘larini erta ekish borasida o‘z tavsiyalarini berib o‘tdi va aksincha kech ekilgan hollarda g‘alla yaxshi tuplashga va ildiz otishga ulgurmasligini, qishga kuchsiz holatda kirishini, buning oqibatida sovuq ta’sirida nihollarning 10-15 foizi nobud bo‘lishi va oxir-oqibatida 25-30 foiz hosilning yo‘qotilishiga olib kelishini aytib o‘tdi.
Bundan tashqari vazir kuzgi bug‘doy ekish jarayonida nav tanlash ham muhim ahamiyatga ega ekanligini, bu borada navlarni almashlab ekish hamda tindirilgan urug‘larni yerga qadash eng maqbul chora hamda hosilni karrasiga oshirishda muhim ahamiyat kasb etishini ta’kidlar ekan, mas’ullarga bu borada o‘z tavsiyalarini berib o‘tdi.
Aytish kerak, fermer xo‘jaligida 2023-yildan qolgan, tindirilgan urug‘lar qadalmoqda. Bundan tashqari, 100 gektar maydonga tajriba tariqasida sovutgichlarda 0-4 daraja haroratda saqlab, tindirilgan urug‘larni ham ekish nazarda tutilmoqda.
Yana bir tajriba sifatida don, chigit — umuman olganda urug‘lar magnit maydoni ta’sirida ma’lum muddat saqlab turilsa, urug‘ mag‘zidagi fiziologik jarayonlar rivojlanib, unuvchanligi baquvvat bo‘ladi. Bu tajriba ham fermer xo‘jaligida qo‘llanilmoqda hamda bu orqali hosilni karrasiga oshirish imkoniyatlari yuzaga keladi.