Paxtachilik amaliy seminari: ilm-fan va amaliyot bir maydonda
2026-08-04 17:40:00 / Yangiliklar
Navoiy viloyati Navbahor tumanida Qishloq xo‘jaligi vaziri Ibrohim Abdurahmonov ishtirokida paxtachilikda yuqori hosildorlikni ta’minlash, ilm-fan yutuqlarini amaliyotga keng joriy etish hamda zamonaviy agrotexnologiyalarni qo‘llash masalalariga bag‘ishlangan amaliy seminar bo‘lib o‘tdi.
Tadbirda Navbahor tumani va unga yondosh tumanlardagi fermerlar, agronomlar, tuman hokimlarining qishloq va suv xo‘jaligi masalalari bo‘yicha o‘rinbosarlari, olimlar hamda soha mutaxassislari ishtirok etdi.
Seminarda “Paxtachilikda yuqori hosildorlikka erishishning 8 ta qonuni” asosida g‘o‘za parvarishining bugungi bosqichida bajarilishi zarur bo‘lgan agrotexnik tadbirlar, sug‘orish va oziqlantirish tizimini samarali tashkil etish, zararkunanda va kasalliklarga qarshi kurashish hamda hosildorlikni oshirishning ilmiy asoslari muhokama qilindi.
Mutaxassislar tomonidan dala sharoitidan kelib chiqib agrotexnik tadbirlarni rejalashtirish, suv va mineral o‘g‘itlardan oqilona foydalanish, g‘o‘za rivojlanish bosqichlariga mos parvarish ishlarini tashkil etish bo‘yicha amaliy tavsiyalar berildi.
Shuningdek, seminar davomida mikroplastik ifloslanish, antibiotiklarga chidamlilik muammosi hamda kremniy o‘g‘itlaridan foydalanish bo‘yicha mahalliy olimlarning ilmiy ishlanmalari taqdim etildi.
Qishloq xo‘jaligi vaziri Ibrohim Abdurahmonov dala ishlarini belgilangan muddatlarda, sifatli va ilmiy yondashuv asosida tashkil etish, ilg‘or tajribalarni keng ommalashtirish hamda har bir agrotexnik tadbirni o‘z vaqtida bajarish mo‘l va sifatli hosil yetishtirishning asosiy omili ekanini ta’kidladi.
Seminar yakunida ishtirokchilar bilan ochiq muloqot o‘tkazilib, ularni qiziqtirgan savollarga mutaxassislar tomonidan batafsil javoblar berildi.