Agrar sohada ekologik va investitsiyaviy hamkorlikning yangi yo‘nalishlari belgilandi
2026-08-03 18:25:00 / Rahbariyatning bayonotlari va nutqlari
Uchrashuvda qishloq xo‘jaligi va yashil iqtisodiyot yo‘nalishlarida istiqbolli investitsiya loyihalarini amalga oshirish, qayta tiklanuvchi energiya manbalaridan foydalanish hamda agrar biomassa asosida yuqori qo‘shilgan qiymatga ega mahsulotlar ishlab chiqarish bo‘yicha hamkorlik istiqbollari muhokama qilindi.
Shuningdek, ekologik toza aviatsiya yoqilg‘isi — Sustainable Aviation Fuel (SAF) ishlab chiqarish loyihalari yuzasidan fikr almashildi. Xususan, loyihaning birinchi bosqichida sho‘rlangan hamda foydalanilmayotgan yer maydonlarida qurg‘oqchilikka chidamli moyli ekinlarni yetishtirish uchun zarur urug‘larni olib kelish va ularni ekish ishlarini tashkil etish, ikkinchi bosqichda esa mazkur ekinlarni yetishtirish hamda ular asosida ishlab chiqarish amaliyotlarini bosqichma-bosqich kengaytirish masalalari ko‘rib chiqildi.
Tomonlar mazkur loyihalarni amalga oshirishni qo‘llab-quvvatlash maqsadida soliq imtiyozlari, suv resurslarini subsidiyalash hamda uglerod bozorlari (carbon markets) mexanizmlaridan samarali foydalanish orqali investorlar uchun qulay sharoitlar yaratish masalalarini ham muhokama qildilar.
Uchrashuv davomida EcoCeres kompaniyasining dekarbonizatsiya yo‘nalishidagi ilg‘or tajribasi va texnologik yechimlari taqdim etildi.
Kompaniya qayta tiklanuvchi dizel yoqilg‘isi (HVO), ekologik toza aviatsiya yoqilg‘isi (SAF), bioetanol hamda boshqa biokimyoviy mahsulotlar ishlab chiqarishga ixtisoslashgan bo‘lib, xomashyo sifatida foydalanilgan o‘simlik moylari, oziq-ovqat sanoati chiqindilari va qishloq xo‘jaligi biomassasidan foydalanadi.
Muloqot yakunida tomonlar agrar sohada innovatsion va ekologik barqaror texnologiyalarni joriy etish, investitsiyaviy hamkorlikni kengaytirish hamda istiqbolli loyihalarni birgalikda ishlab chiqish bo‘yicha muloqotni izchil davom ettirishga kelishib oldilar.