Kasbiy ma’rifat soati: Xitoy tajribasi va sun’iy intellektning oziq-ovqat xavfsizligidagi o‘rni muhokama qilindi
2026-07-17 12:45:00 / Yangiliklar
Ma’ruzada joriy yil 17–30-iyun kunlari Xitoy Xalq Respublikasining Pekin va Nanjing shaharlarida “Bir kamar, bir yo‘l” tashabbusi doirasida ishtirokchi mamlakatlar vakillari uchun tashkil etilgan “Oziq-ovqat xavfsizligini tartibga solishda sun’iy intellektni qo‘llash” mavzusidagi xalqaro seminar yakunlari haqida batafsil ma’lumot berildi.
Ma’ruza davomida Xitoyning sun’iy intellekt sohasidagi yutuqlari, ushbu texnologiyalarni qishloq xo‘jaligi tarmog‘iga joriy etish tajribasi hamda oziq-ovqat xavfsizligini ta’minlashdagi innovatsion yondashuvlari haqida so‘z yuritildi.
Jumladan, sun’iy intellekt asosida ekinlar holatini masofadan monitoring qilish, hosildorlikni prognozlash, kasallik va zararkunandalarni erta aniqlash, resurslardan oqilona foydalanish hamda qishloq xo‘jaligi mahsulotlari harakatini raqamli nazorat qilish kabi yo‘nalishlarda qo‘llanilayotgan ilg‘or texnologiyalar misol tariqasida keltirildi.
Tadbir yakunida vazirlik xodimlari ma’ruza yuzasidan o‘zlarini qiziqtirgan savollar bilan murojaat qilib, xalqaro tajribani mamlakatimiz qishloq xo‘jaligida qo‘llash istiqbollari yuzasidan fikr almashdilar.