Sho‘rlangan yerda yangi imkoniyat: Xonqada jut yetishtirish jarayonlari ko'zdan kechirildi
2026-06-04 14:25:00 / Yangiliklar
Jut ekini qisqa muddatda yuqori biomassa hosil qilishi, turli tuproq-iqlim sharoitlariga moslasha olishi hamda ekologik jihatdan foydali ekinlardan biri hisoblanadi. Ayniqsa, sho‘rlanishga moyil hududlarda ushbu ekinni sinov tariqasida yetishtirish yerlarning meliorativ holatini yaxshilash va fermerlar uchun qo‘shimcha daromad manbalarini yaratishda muhim ahamiyat kasb etadi.
Xonqa tumanida joriy yilda jami 21 gektar maydonga jut ekini ekilgan bo‘lib, bugungi kunda agrotexnik tadbirlar belgilangan tartibda olib borilmoqda. Vazir ekinlarning rivojlanish holati, sug‘orish va parvarishlash ishlari bilan tanishar ekan, mas’ullarga natijalarni chuqur tahlil qilish, hosildorlik ko‘rsatkichlarini o‘rganish hamda ushbu ekinni yetishtirishning iqtisodiy samaradorligini baholash yuzasidan tegishli topshiriqlar berdi.
Jut dunyo miqyosida paxtadan keyingi eng muhim tabiiy tolali ekinlardan biri sanaladi. Uning poyasidan olinadigan tolalar qoplar, arqonlar, geotekstil mahsulotlari, qadoqlash materiallari va boshqa ko‘plab sanoat mahsulotlarini ishlab chiqarishda keng qo‘llaniladi. So‘nggi yillarda ekologik toza va biologik parchalanadigan mahsulotlarga talab ortib borayotgani sababli jutga bo‘lgan qiziqish ham tobora kuchaymoqda.